Якшанба куни кечқурун Франция президенти Эмманюэль Макрон аҳолига мурожаат қилди. У тартибсизликлар иштирокчиларига нисбатан муросасиз муносабатда бўлишини таъкидлаб, фуқароларни хотиржамликка чақирди.
«Французлар қандай қилиб Францияга бундай зарар етказиши мумкин? Буни ҳеч нарса оқламайди, тушунтириб бермайди ва кечиримли қилмайди», — деди Макрон кечаги воқеалар, жумладан, Лимож шаҳри мэриясига ўт қўйилганини тилга олиб.
Президент тартибсизликларда ўта сўл гуруҳларнинг исёнкор аъзолари ва уларга қўшилган жиноий элементларни айблади.
«Талон-торож қилганлар зарарни қоплаши, вайронгарчиликка сабаб бўлганлар эса бунинг учун жавоб бериши керак», — деди у. Макрон ҳуқуқбузарликларда айбдор деб топилган шахслар суд олдида жавоб беришини таъкидлади.
Унинг сўзларига кўра, Франция адлия вазири прокурорлардан талончилик ва вайронгарчиликка оид ишлар бўйича қатъий чоралар кўришни талаб қилган.
Макрон ҳукуматга юз берган воқеалардан зарур хулосалар чиқариш, жумладан, разведка маълумотларини таҳлил қилиш ва тартибсизликларни олдиндан прогнозлаш тизимини такомиллаштириш бўйича топшириқ берганини айтди.
Макрон ёқилғи нархининг ошишини Яқин Шарқдаги уруш оқибатлари билан боғлади. У Францияга ёқилғи ва газ етказиб беришни таъминлаш бўйича халқаро саъй-ҳаракатларни давом эттириш мақсадида Форс кўрфази мамлакатларига ташриф буюришини маълум қилди.
Франциядаги намойишлар турмуш қимматлашуви, ёқилғи нархининг ошиши ва давлат хизматлари сифати билан боғлиқ норозиликлар фонида бўлиб ўтмоқда. Тинч намойишларнинг айримлари тартибсизликлар, талончилик ва дўконларга ҳужумлар билан давом этган. Ҳукумат ҳуқуқбузарликларни содир этган шахсларни жавобгарликка тортишини билдирган.
Франция Ички ишлар вазирлиги маълумотига кўра, воқеалар давомида 2 300 дан ортиқ киши қўлга олинган.
Якшанба куни Париж ва Лион шаҳарларида ҳам полиция билан тўқнашувлар ва дўконларга ҳужум қилиш каби айрим ҳодисалар қайд этилган. Париждаги Республика майдонида полиция бир неча юз кишини тарқатиш учун кўздан ёш оқизувчи газ қўллаган.
Изоҳ