Жиноят ишлари бўйича Сариосиё туман судида эҳтиётсизлик оқибатида одам ўлимига олиб келган собиқ профилактика инспектори А.Р.га нисбатан жиноят иши кўриб чиқилди.
Аввалроқ, жорий йилнинг май ойида Денов туманида содир бўлган фожиа ҳақида хабар берган эдик. Ўшанда аёл 3 ёшли қизчани пичоқлаганди, натижада бола вафот этганди.
Суд мажлисида маълум бўлишича, ўтган йилнинг октябрь ойида руҳий касалликка чалинган фуқаро С.А. телефонини ўғирлаб, унга нисбатан жиноят иши қўзғатилган.
Суд экспертизасига кўра, аёл ўтир руҳий носоғлом деб топилган. Жорий йилнинг 20 январь куни Узун туман суди унга нисбатан Республика ихтисослаштирилган руҳий саломатлик марказининг Сурхондарё филиалида мажбурий даволаш чорасини қўллаш ҳақида ажрим чиқарган. Суд қарорини ижро этиш Денов тумани ИИБга юклатилган.
Шу бўлим профилактика инспектори А.Р. С.А.ни тиббиёт муассасасига юборишни таъминламаган, бунга масъулиятсизлик ва совуққонлик билан ёндашган. Натижада жорий йилнинг 1 май куни С.А. бозорга бориб, пичоқ сотиб олган ва у билан 3 ёшли болани урган. Жабрланган қиз воқеа жойида вафот этган.
Судда А.Р. айбига иқрор бўлиб, суддан ҳақиқатан ҳам аёлни мажбурий даволаш тўғрисида ижро ҳужжати олганини, бироқ уни бажармаганини, чунки аёл вақтинча қариндошлариникига кетган, ўзи эса бошқа хизмат ишлари билан банд бўлган деб ҳисоблаганини маълум қилди.
Кейинчалик у А.С. қотиллик содир этганини билиб, бунинг оқибатлари нақадар оғирлигини англаб етади ва пушаймон бўлади.
Суд ҳукми билан А. Р. Жиноят кодексининг 207-моддаси 3-қисми "а" бандида назарда тутилган жиноятни содир этганликда айбдор деб топилиб, унга 2 йил 6 ой муддатга ИИВ тизимида хизмат қилиш ҳуқуқидан маҳрум қилган ҳолда 3 йил муддатга озодликни чеклаш жазоси тайинланди.
Изоҳ