Марказий банк "Евроосиё банки" лицензиясини устав капитали пастлиги сабабли қайтариб олди

Марказий банк 27 августдаги Бошқарув қарорига асосан «Евроосиё банки» АЖнинг банк фаолиятини амалга ошириш учун берилган лицензиясини бекор қилди.

"Бундай қарор устав капитали ҳажмининг қонунчиликда белгиланган минимал талабларга мос келмаслиги, шунингдек, банклар ва банк фаолияти тўғрисидаги қонунчиликда назарда тутилган бошқа талаблар бажарилмаганлиги сабабли қабул қилинди", — дейилади хабарда.

Ўзбекистон Республикасининг "Марказий банк тўғрисида", "Банклар ва банк фаолияти тўғрисида"ги қонунлари ҳамда бошқа меъёрий ҳужжатлар асосида банкни мажбурий равишда тугатиш ва тугатиш комиссиясини тайинлаш тўғрисида қарор қабул қилинди.

Ягона давлат рўйхати маълумотларига кўра, "Евроосиё банки" АЖ 2024 йил январь ойида рўйхатдан ўтган. Устав фонди 200 миллиард сўмни ташкил этган.

2023 йил апрель ойида банклар учун устав капитали минимал миқдорини босқичма-босқич ошириш тўғрисидаги қонун имзоланган эди: 2023 йил 1 сентябрдан — 200 млрд сўм, 2024 йил 1 апрелдан — 350 млрд сўм, 2025 йил 1 январдан — 500 млрд сўм.

Эслатиб ўтамиз, 2023 йил май ойида Марказий банк Қозоғистон банкига Ўзбекистонда дочер компания очиш учун дастлабки рухсат берган эди. 2024 йил январь ойида эса банкка банк фаолиятини амалга ошириш учун лицензия берилган.

Шу пайтдаёқ банк Тошкентда офис очиш ва мамлакатда фаолият бошлашга тайёргарлик кўраётгани ҳақида маълум қилинган эди.