Самарқанд вилояти Нарпай туманида 48 ёшли аёл ўз келининг қотилига айланди. Бу ҳақда "Замон" дастури хабар қилди.
Маълум қилинишича, қайнона 2 нафар фарзандини ёшлигида болалар уйига ташлаб кетган. Сўнгра ўғли уйлангандан сўнг у қайтиб келиб, ўғли билан яшай бошлаган.
Марҳума келин бўлиб тушганига 1 ой бўлган. Бироқ қайнона ва келин ўртасида доимий оилавий тортишувлар бўлган.
Ўғли уйда йўқлигидан фойдаланиб, қайнона келин билан жанжаллашган. Телефон аппаратининг қувватлагич сими билан келинининг бўйнидан бўғиб, шу ерда турган шиша сув бакал билан бошига урган. Қайчини бўйин соҳасига 1 маротаба санчган. Шунингдек, ошхона пичоғи билан келининг кўкрак қафасига 2 марта зарба берган.
Келин олган тан жароҳатлари сабаб воқеа жойида вафот этган. Сўнгра қайнона уйдан қочиб кетган. Бироқ ИИБ ходимлари томонидан қўлга олинган.
Ҳолат юзасидан суд иши ЖИБ Қўшработ тумани судида кўриб чиқилди. Суд ҳукмига кўра, қайнона ЖКнинг 97-моддаси 2-қисми "ж" бандида назарда тутилган жиноятни содир этганликда айбдор деб топилиб, ЖКнинг 57-моддасини қўллаб, унга нисбатан 13 йил муддатга озодликдан маҳрум қилиш жазоси тайинланди.
