Тошкент шаҳар Ички ишлар бош бошқармаси ҳамда Давлат хавфсизлик хизмати тезкор ходимлари 1995 йилда туғилган, муқаддам мазкур ўқув марказида қўриқчи бўлиб ишлаган шахс жиноий режа муаллифи эканини аниқлади. У уч нафар танишини жалб қилиб, марказда сақланаётган катта миқдордаги пул маблағларини босқинчилик йўли билан қўлга киритишни режалаштирган.
Режага кўра, ҳар бир иштирокчининг ўз вазифаси бўлган. Собиқ қўриқчи аввалдан ички вазиятни ўрганиб, шерикларига пуллар турган жой ҳақида хабар бериши, бошқа иштирокчи эса электр таъминотини узиши керак эди.
Ниқобланган гуруҳ аъзолари орқа эшикдан кириб, пулларни қопларга жойлаштириши ва ижарага олинган автомобиль орқали олиб чиқиб кетиши белгиланган. Улардан бири жиноятини яшириш ва гувоҳларни чалғитиш мақсадида ҳатто аёллар кийимида бўлган.
Пулларни қўлга киритгач, жиноятчилар Фарғона вилояти орқали қўшни республикалардан бирига чиқиб кетишни ҳам кўзда тутган. Аммо тезкор ходимлар бир қадам олдинда ҳаракат қилиб, жиноятнинг олдини олди. Гуруҳ аъзолари бинога кирганидан сўнг қўлга олинди.
Уларнинг ёнидан ниқоблар, болға, қоплар, қўлқоплар, рациялар, эшикларни очиш учун мўлжалланган махсус мосламалар, калит нусхалари ҳамда хорижга чиқиш паспорти далилий ашё сифатида олинган.
Тергов бошқармаси томонидан мазкур шахсларга нисбатан Жиноят кодексининг 164-моддаси 2-қисми «а», «б» бандлари билан жиноят иши қўзғатилиб, уларга қамоққа олиш тарзидаги эҳтиёт чораси қўлланган. Ҳозирда дастлабки тергов ҳаракатлари олиб борилмоқда.
Ушланганлардан бири қилмишига пушаймон бўлаётганини айтиб, «осон пулнинг орқасидан югурганини» таъкидлади ва, энг аввало, болаларидан узр сўради.
Изоҳ