Юнусобод туманида оилавий поликлиникага эски лифт ўрнатиб берган МЧЖ раҳбари аниқланди. Бу ҳақда Бош прокуратура Матбуот хизмати хабар берди.
Аниқланишича, Юнусобод туманда “L.K.” МЧЖ раҳбари Ж.Х. ва бошқалар “D.T.” хусусий корхонаси билан тузилган шартномага асосан тумандаги 56-сонли оилавий поликлиникага фойдаланишга яроқсиз бўлган 2 дона эски лифтни техник тайёрлиги ҳақидаги ҳужжатларни сохталаштириш орқали ўрнатиб беришиб, 340 млн сўмни ўзлаштириш йўли билан талон-торож қилганликлари аниқланган.
Саноат хавфсизлиги давлат қўмитасининг хулосасига кўра, ушбу лифтлар 1990 йилда ишлаб чиқарилган бўлиб, техник жиҳатдан фойдаланиш учун яроқсиз эканлиги маълум бўлган.
Мазкур ҳолат юзасидан ЖКнинг 167-моддаси (ўзлаштириш ёки растрата йўли билан талон-торож қилиш) ва 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят иши қўзғатилиб, тергов ҳаракатлари ўтказилмоқда.
