Ўзбекистон қамоқхоналарида сақланаётган маҳкумларнинг ўртача 9 фоизи коронавирусдан даволанган. Бу ҳақда ИИВ Жазони ижро этиш Бош бошқармаси даволаш профилактика ёрдамини ташкиллаштириш бўлими бошлиғи Баҳодир Юсупов маълум қилди.
ИИВ вакилига кўра, дастлабки 4 ой давомида жазони ижро этиш муассасаларида коронавирус билан оғриган беморлар қайд этилмаган.
– Шуни таъкидлаш керакки, ЖИЭМларда сақланаётган маҳкумларнинг ўртача 9 фоизга яқини касалликни бошдан кечирди. Коронавируснинг енгил шаклини жазони ижро этиш муассасаларининг ўзида даволадик. Бироқ ўрта оғир ёки оғир шаклларини ССВ тасарруфидаги 4 та ҳудудда – Бухоро, Қашқадарё, Навоий ва Тошкент вилоятлари ҳудудидаги соғлиқни сақлаш муассасаларида даволадик. Лекин бирорта ўлим билан боғлиқ ҳолат юз бермади, - деди Баҳодир Юсупов.
Шунингдек, Қашқадарё ва Бухоро вилоятларидаги қамоқхоналарда сақланаётган коронавируснинг ўта оғир шакли билан касалланган 2 нафар шахс Жиноят кодексининг 75-моддаси ва Жиноят-ижроия кодексининг 165-моддасига асосан муддатидан аввал озод қилингани маълумот учун айтиб ўтилди.
