BYD автомашинаси ҳайдовчиси тўхтаб турган бир нечта автомашинага шикаст етказилаётганлиги акс этган видео ижтимоий тармоқларга сиздирилди. Ҳолат юзасидан Хоразм вилояти ИИБ маълумот берди.
Жорий йилнинг 4 август куни Урганч шаҳрининг "Истиқлол" маҳалласи ҳудудида 2000 йилда туғилган Ш.Б. ҳамда Урганч туманининг "Шерматлар" маҳалласида яшовчи, 1999 йилда туғилган Х.Б. ўртасида ўзаро келишмовчилик келиб чиққан.
Натижада Х.Б. ўзига тегишли бўлган қора рангли BYD Chazor автомашинасини кескин бошқариб, Ш.Б.га тегишли Cobalt автомашинага, шунингдек воқеа жойида тўхтаб турган бошқа фуқароларга тегишли оқ рангли BYD Chazor ҳамда Damas автомашиналарига қасддан шикаст етказган. Оқибатда транспорт воситалари техник шикастланган. Ҳодиса оқибатида фуқароларга тан жароҳати етмаган.
Мазкур ҳуқуқбузарлик юзасидан "Ташвиш тугмаси" орқали келиб тушган хабарга асосан воқеа жойига зудлик билан етиб борган ИИО ходимлари томонидан ҳуқуқбузарнинг ҳаракатлари тўхтатилиб, иштирокчиларнинг барчаси ИИОга олиб келинган.
"Ҳозирги вақтда мазкур ҳолат юзасидан Урганч шаҳар ички ишлар бошқармаси томонидан терговга қадар текширув ҳаракатлари олиб борилмоқда. Текширув якунларига кўра қонуний қарор қабул қилиниши таъминланади," - дейилади хабарда.
Изоҳ