Агентлик пойтахтда автобус бекатларини модернизация қилиш билан боғлиқ ҳолатларни ўрганиб чиқди.
Маълум қилинишича, президент қарорларига мувофиқ, Тошкентдаги 1 785 та автобус бекатини модернизация қилиш белгиланган. Бунинг учун бекатлар, ер участкалари ва иншоотлар ижара ҳуқуқи билан «E-auksion» электрон савдо платформасига чиқарилган.
Белгиланган талабларга кўра, бекатларни реконструкция қилиш ва янги намунавий павильонлар ўрнатиш ишлари электрон аукцион ғолибининг ўз маблағлари ҳисобидан амалга оширилиши керак эди.
2025–2026 йилларда ўтказилган аукционлар якунларига кўра, Ewi Snacks МЧЖ 266 та бекат жойлашган ер участкалари ҳамда қўшимча 230 та ижтимоий бекатни қуриш бўйича ғолиб деб топилган ва компания билан тегишли ижара шартномалари тузилган.
Тасдиқланган жадвалга мувофиқ, жорий йилнинг май–июнь ойларида 120 та бекат — 60 та ижара асосидаги ва 60 та ижтимоий бекат фойдаланишга топширилиши лозим эди.
Бироқ текширув давомида кўплаб объектларда қурилиш-монтаж ишлари тугалланмагани, зарур жиҳозлар тўлиқ ўрнатилмагани аниқланган. Шунингдек, фойдаланишга топширилиши режалаштирилган 120 та бекатнинг бирортаси бўйича ҳам қабул қилиш далолатномаси расмийлаштирилмаган.
Шу муносабат билан Тошкент шаҳар ҳокимлигига шартнома ва келишувларда назарда тутилган мажбуриятларни ўз вақтида ва тўлиқ бажаришни таъминлаш, шунингдек, бекатларни техник талабларга мувофиқ жиҳозлаш ва уларни фойдаланишга топшириш устидан қатъий назорат ўрнатиш юклатилди.
Бундан ташқари, келгусида аукционлар ўтказишда автобус бекатларини туманлар ёки бошқа ҳудудий бирликлар кесимида алоҳида лотлар сифатида сотувга чиқариш топширилди. Бу рақобатни кучайтириш ва кўпроқ тадбиркорларни жалб қилишга хизмат қилиши таъкидланган.
Коррупцияга қарши курашиш агентлиги мазкур ҳолат юзасидан ўрганишларни давом эттириши ва аниқланган камчиликларни бартараф этиш бўйича тегишли чоралар кўрилишини маълум қилди.
Изоҳ