Кеча Жаҳон чемпионатининг иккинчи ярим финалида Аргентина Англияни 2:1 ҳисобида мағлуб этиб, кетма-кет иккинчи бор мундиал финалига чиқди. Учрашув драматик сценарий асосида кечди: Англия ҳисобни очди, аммо Аргентина сўнгги дақиқаларда Энцо Фернандес ва Лаутаро Мартинеснинг голлари эвазига камбэк амалга оширди. Ҳар икки голга ҳал қилувчи узатмани Лионель Месси амалга оширди.
Англия нима учун ютқазди?
Томас Тухель шогирдлари ўйиннинг катта қисмида режа бўйича ҳаракат қилди. Энтони Гордоннинг голидан кейин Англия ташаббусни рақибга бериб қўйди ва ҳисобни сақлаб қолишга уриниб ҳимояга ётиб олди. Бу эса Аргентина учун айнан керакли сценарий бўлди.
Скалони жамоаси тўп назоратини қўлга олди, марказда Энцсо Фернандес ҳамда Родриго Де Паул ўйин суръатини оширди. Месси эса одатдагидек майдондаги ҳар бир ҳужумнинг марказида бўлди. 85-дақиқада Энцо ҳисобни тенглаштирди, қўшимча вақтда эса Лаутаро Мартинес Англияни "синдирган" голни урди.
Англиянинг асосий хатоси — гол урилганидан кейин ҳимояга жуда эрта ётиб олганида бўлди. Бундай рақибга қарши 30–35 дақиқа давомида фақат ҳимоя қилиш деярли ҳар доим жазоланади.
Аргентинанинг асосий қуроли — тажриба
Бу жамоа ҳаяжонга берилмайди. Ҳатто 85-дақиқагача ютқазаётган бўлса ҳам, футболчилар ўз режасидан ташқарига чиқмайди. Бу чемпионлик кўрган жамоаларга хос сифат.
39 ёшли Лионель Месси аввалгидек ҳар бир вазиятда дриблинг қилмаслиги мумкин. Аммо у ҳали ҳам ўйин тақдирини биргина узатма билан ҳал қила оладиган футболчи эканини яна бир бор исботлади.
Финал: Испания — Аргентина
Энди бор эътибор 19 июль куни бўладиган финалга қаратилган. Бу шунчаки икки жамоанинг эмас, икки хил футбол фалсафасининг тўқнашуви бўлади.
Испаниянинг устунликлари:
- юқори прессинг;
- тўп назорати;
- тезкор позицион ҳужумлар;
- жисмоний тайёргарлик.
Испания мусобақа давомида Франция ва Бельгия каби кучли рақибларни ишончли мағлуб этди ва ҳозирча энг барқарор жамоалардан бири бўлиб турибди.
Аргентинанинг устунликлари:
- катта турнирлардаги тажриба;
- психологик барқарорлик;
- Мессининг ҳал қилувчи таъсири;
- Лаутаро, Энцо ва Альварес каби футболчиларнинг юқори формаси.
Ким чемпион бўлади?
Қоғозда Испания бироз фаворитдек кўринади. Уларнинг ўйини тезроқ, прессинги кучлироқ ва ёш жиҳатидан ёшроқ жамоа. Бироқ финалларда статистика эмас, характер ҳал қилади.
Аргентина сўнгги йилларда айнан шундай учрашувларда ўзини энг яхши томондан кўрсатиб келмоқда. Агар Месси яна бир бор ҳал қилувчи роль ўйнаса, Аргентина кетма-кет иккинчи жаҳон чемпионлигини қўлга киритиши мумкин.
Агар Испания ўз прессингини 90 дақиқа давомида сақлай олса ва Мессига эркин ҳудуд бермаса, Европа чемпионларида Жаҳон чемпионати кубогини қўлга киритиш имконияти юқори бўлади.
Бир нарса аниқ — бу финал сўнгги йиллардаги энг катта ва энг кутилган тўқнашувлардан бири бўлади. Испаниянинг жамоавий футболи Аргентинанинг чемпионлик руҳига қарши майдонга чиқади. Бу нафақат кубок учун, балки замонавий футболда қайси услуб устунлигини исботлаш учун ҳам ҳал қилувчи баҳс бўлади.
Жаҳонгир Сотволдиев
Изоҳ