Коррупцияга қарши курашиш агентлиги Ички ишлар вазирлиги билан ҳамкорликда давлат хизматчилари учун жазони ижро этиш муассасалари ва тергов ҳибсхоналарига профилактик ташрифлар ташкил этишни бошлади.
«Бундай ташрифларнинг асосий мақсади давлат хизматчиларига коррупциявий ҳуқуқбузарликларнинг оғир оқибатларини яққол кўрсатиш, ҳар қандай ноқонуний ҳаракатнинг ҳуқуқий оқибатлари муқаррар эканини англатиш, хизмат ваколатларидан фақат давлат ва жамият манфаатлари йўлида фойдаланиш масъулиятини ошириш, шунингдек, ҳалоллик ва қонун устуворлиги тамойилларига содиқликни мустаҳкамлашдан иборат», — дейилади идора хабарида.
Дастлабки ташрифда Қурилиш ва уй-жой коммунал хўжалиги вазирлиги раҳбарияти ва масъул ходимлари, шунингдек, Кадастр агентлиги вакиллари иштирок этди.
Ташриф давомида давлат хизматчиларига тергов хоналари, сақлаш камералари ва муассасанинг бошқа инфратузилма объектлари кўрсатилди. Шунингдек, коррупция жиноятлари учун жазо ўтаётган маҳкумлар билан учрашувлар ташкил этилди.
Маҳкумлар ўзлари қабул қилган ноқонуний қарорлар нафақат шахсий ҳаётига, балки оиласи, фарзандлари, меҳнат фаолияти ва жамиятдаги обрўсига ҳам салбий таъсир кўрсатганини сўзлаб беришди.
Қайд этилишича, бундай мулоқотлар давлат хизматчиларига коррупция оқибатлари фақат жиноий жавобгарлик ёки озодликдан маҳрум этиш билан чекланмаслигини, балки инсоннинг келажаги, оиласи фаровонлиги ва жамиятдаги мавқеига ҳам жиддий зарар етказишини англашга ёрдам беради.
Келгусида шундай ташрифлар бошқа вазирлик ва идоралар раҳбарлари ҳамда ходимлари учун ҳам босқичма-босқич ташкил этилади. Аввало коррупция хавфи юқори бўлган соҳаларда фаолият юритаётган ташкилотлар қамраб олинади.
Изоҳ