Биринчи чорак давомида Рақобатни ривожлантириш ва истеъмолчилар ҳуқуқларини ҳимоя қилиш қўмитасига қурилиш соҳасидаги қонунбузарлик ҳолатлари бўйича фуқаролардан 1000 га яқин мурожаатлар келиб тушди.
Қайд этилишича, уларнинг сони сезиларли даражада ошган, чунки ўтган йил давомида жами 1706 та мурожаат келиб тушган.
Хусусан, қуйидагилар бўйича шикоятлар тобора кўпайиб бормоқда:
• қурилиш компаниялари томонидан шартнома шартларининг бажарилмаслиги;
• қурилиш муддатларининг чўзилиши;
• зарур рухсатномаларни олмасдан фуқароларнинг маблағларини жалб қилиш.
Энг кенг тарқалган эътирозлар қуйидагилар билан боғлиқ:
• қурилиш ишлари сифатининг пастлиги;
• амалда кўрсатилмаган хизматлар учун ҳақ ундириш;
• шартнома шартларига риоя қилмаслик;
• уй-жойни ўз вақтида топширмаслик;
• техник талабларга жавоб бермайдиган материаллардан фойдаланиш;
• рекламаларда эълон қилинган лойиҳалар ва ваъдаларнинг бажарилмаслиги.
Қўмита улушли қурилиш ёки янги қурилган уйлардан-уй-жой сотиб олаётган фуқароларга шартнома шартларини диққат билан ўрганиб чиқиш, бунда қурувчи ва харидорнинг ҳуқуқ ва мажбуриятлари, шунингдек, уларнинг баланси, объектни қуриш ва фойдаланишга топшириш муддатлари, муддатларни бузганлик учун жавобгарлик мавжудлигига алоҳида эътибор қаратиш зарурлигини эслатди.
Бундан ташқари, фуқароларга фақат юридик шахс сифатида рўйхатдан ўтган ва махсус электрон реестрга киритилган қурилиш компаниялари кўп квартирали уйлар қурилиши учун ўз маблағларини жалб қилиш ҳуқуқига эга эканлиги эслатиб ўтилди.
Бундан ташқари, харидор ва қурувчи ўртасидаги ҳисоб-китоблар эскроу ҳисобварақлари, шу жумладан банк кассалари орқали ёки нақд пулсиз шаклда амалга оширилиши керак.
Шунингдек, қўмита барча қурилиш компанияларини қонунчилик талабларига қатъий риоя қилишга, фуқаролар билан шартномаларни виждонан тузишга, қурилишнинг реал муддатларини белгилашга ва уй-жой харидорларининг ҳуқуқлари ва қонуний манфаатларини чекламасликка чақирди.
Қонунчиликнинг белгиланган талабларини бузиш тегишли таъсир чоралари қўлланилишига сабаб бўлади.
Изоҳ