5 июндан Ўзбекистонда олий таълим муассасалари ҳамда профессионал таълим муассасаларига ҳужжат қабул қилиш бошланди.
Президент қарорига мувофиқ, бакалавриат таълим йўналишларига қабул жараёни «аввал тест, кейин танлов» тамойили асосида икки босқичда ўтказилади.
Биринчи босқич (5–25 июнь)
Абитуриентлар тест синовларида қатнашиш учун my.uzbmb.uz платформаси орқали рўйхатдан ўтиши ва қуйидагиларни танлаши лозим:
Фақат тест синовида иштирок этиш учун:
- фанлар мажмуаси;
- таълим тили;
- тест топшириш ҳудуди.
Ижодий ёки касбий имтиҳон талаб этиладиган йўналишларга ҳужжат топширишда:
- таълим тили;
- тест топшириш ҳудуди;
- алоҳида иқтидор талаб этувчи таълим йўналиши;
- касбий (ижодий) имтиҳон ўтказиладиган олийгоҳ.
Олий таълим муассасаларига кириш имтиҳонлари июль–август ойларида бўлиб ўтади.
Иккинчи босқич
Кириш имтиҳонлари тўлиқ якунланганидан кейин 15 кун давомида абитуриентлар my.uzbmb.uz сайти орқали:
- олий таълим муассасасини;
- бакалавриат таълим йўналишини;
- таълим шаклини;
- танлов устуворлигини белгилайди.
Тест натижалари имтиҳон топширилган куннинг эртасигаёқ эълон қилинади. Абитуриентнинг ўқишга тавсия этилгани ёки этилмагани ҳақидаги маълумотлар қабулнинг иккинчи босқичи якунланганидан кейин бир ҳафта ичида Билим ва малакаларни баҳолаш агентлигининг расмий сайтида эълон қилинади.
Техникумларда ўқиш истагида бўлган абитуриентлар эса олийгоҳларга қабулнинг якуний натижалари эълон қилинганидан сўнг 10 кун ичида:
- техникумни;
- касб ёки мутахассисликни;
- таълим шаклини танлайди.
Техникумларга қабул натижалари ҳам Билим ва малакаларни баҳолаш агентлигининг расмий сайтида бир ҳафта ичида эълон қилинади.
Қўшимча саволлар бўйича фуқаролар Олий таълим вазирлигининг 1006, Билим ва малакаларни баҳолаш агентлигининг 1195 ишонч телефонлари ёки @EduuzUniversalBot орқали мурожаат қилишлари мумкин.
Изоҳ