Ҳокимлик матбуот хизмати 3 май куни "Чорсу" метро бекати ҳудудида сув тўпланиб, бекатга тушишни тўсиб қўйгани ҳолатига изоҳ берди.
"Фавқулодда ҳолатнинг асосий сабаби суғориш тармоқларининг ўзбошимчалик билан тўсиб қўйилиши бўлиб, бу сувнинг нормал оқиб кетишига тўсқинлик қилди," - дейилади хабарда.
Қайд этилишича, автотураргоҳлар, гаражлар ва йўллар каби ўзбошимчалик билан қурилган бинолар илгари узлуксиз ишлаган суғориш тизимининг ишлашига асосий тўсиқ бўлган.
"Илгари ушбу тармоқлар сувни чиқариб ташлаш ва ушбу ҳудудда сув тошқинларининг олдини олиш билан муваффақиятли шуғулланган, бироқ шаҳарнинг ривожланиши ва рухсатсиз қурилишлар билан вазият ўзгарди," - дейилади ҳокимлик хабарида.
Тошкент шаҳрининг дренаж тизими дастлаб кунига 20 миллиметр ёғингарчиликка мўлжалланганлиги ҳам муҳим жиҳат бўлди. Кеча икки соат давомида ёққан ёмғир 12 миллиметр ёғингарчилик олиб келди, бу нормал шароитда муаммо туғдирмаслиги керак эди. Бироқ суғориш тармоқлари ёпилгани сабабли сув чиқиб кета олмай, сув тошқинига сабаб бўлган," - дея тушунтирди ҳокимлик.
Маълум қилинишича, ҳозирда шаҳар дренаж тизими янада интенсив ёғингарчиликларга мослаштириладиган янги мастер-режа ишлаб чиқилган. Янги тизим кунига 36 миллиметргача ёмғир сувини қайта ишлашга мўлжалланган бўлиб, келгусида бундай ҳодисаларнинг олдини олишга қаратилган.
Қайд этилишича, шаҳар ҳокими воқеа жойига борган.
Ҳозирда ҳодиса содир бўлган ҳудудда махсус техникалар ишламоқда, мавжуд суғориш тармоқларини тиклаш ва кенгайтириш ишлари олиб борилмоқда. Яқин келажакда канализацияни яхшилаш ва кейинги сув тошқинларининг олдини олиш учун янги тармоқлар қурилиши ҳам режалаштирилган.
Изоҳ