Жорий йилда республикада менингококк инфекцияси ҳолатлари ошгани қайд этилди. Бу ҳақда Санитария-эпидемиологик осойишталик ва жамоат саломатлиги қўмитаси матбуот хизмати хабар берди.
Маълум қилинишича, йилнинг биринчи чорагида менингококк инфекциясининг 174 та ҳолати аниқланган бўлиб, уларнинг 168 таси 14 ёшгача бўлган болалар ҳиссасига тўғри келади. Апрель ойида касалланиш кўрсаткичи март ойига нисбатан 14 фоизга камайган.
Инфекция тарқалишининг олдини олиш мақсадида, айниқса болалар ўртасида, қўмита томонидан 8 024 доза вакцина харид қилинган. Касалликка чалинганлар билан мулоқотда бўлган 4 862 нафар шахс эмланган.
Вакцинацияга тиббий қарши кўрсатмаси бўлган шахсларга эса шифокорлар назорати остида химиопрофилактика муолажалари ўтказилмоқда.
Менингит — бош ва орқа мия пардалари яллиғланиши бўлиб, кўп ҳолларда бактериялар ёки вируслар томонидан келиб чиқади ва тез ривожланиши билан хавфли ҳисобланади.
Профилактика чоралари қуйидагиларни ўз ичига олади:
— ўз вақтида вакцинация қилиш; — шахсий гигиена қоидаларига риоя этиш; — касалликнинг илк белгиларида шифокорга мурожаат қилиш; — жамоат жойларида эҳтиёт чораларига амал қилиш; — ҳаж ва умра сафарлари олдидан менингококк инфекциясига қарши эмланиш, шунингдек қайтгандан сўнг оммавий тадбирларда иштирокни чеклаш.
Фуқароларга вакцинация менингококк инфекциясидан ҳимояланишнинг энг самарали усулларидан бири экани эслатиб ўтилди.
Изоҳ