Энди шахсий эҳтиёж учун 3 килограммгача биологик фаол қўшимчаларни божсиз олиб кириш мумкин. Бу ҳақда Вазирлар Маҳкамасининг жорий йил 9 апрелдаги 154-сон қарорида белгиланди.
Янги тартибга кўра, жисмоний шахслар хориждан 10 хил номдаги бирламчи қадоқдаги фаол қўшимчаларни ҳар биридан битта қадоқдан ошмаган ҳолда олиб киришлари мумкин. Бунда умумий оғирлик 3 килограммдан ошмаслиги шарт.
Аввалги тартибда эса биологик фаол қўшимчаларни олиб кириш меъёрлари уларнинг шаклига қараб белгиланган эди. Масалан, таблетка ёки капсула кўринишидагилардан 100 донагача олиб кириш мумкин бўлган. Кукун ҳолатида эса 0,5 кг миқдорида бўлган.
Бироқ бир қадоқдаги маҳсулот сони белгиланган меъёрдан ошиб кетган ҳолатларда аниқ тартиб мавжуд эмас эди ва бу амалиётда тушунмовчиликларга сабаб бўлиб келаётган эди.
Янги ўзгаришлар орқали ушбу ноаниқликлар бартараф этилди. Шунингдек, меъёрларни белгилашда аҳолининг таклиф ва эҳтиёжлари ҳам инобатга олинди.
Изоҳ