Жорий йил 22 апрелдан бошлаб мобил иловадан фойдаланиш учун у бириктирилган телефон рақами айнан ўша шахс номига рўйхатдан ўтказилиши керак, дейилади Марказий банк бошқаруви қарорида.
Ҳужжатга кўра, кредит ва тўлов ташкилотлари учун сайтлар ва мобил иловаларда фойдаланувчиларни рўйхатдан ўтказишда талаблар белгиланган.
Хусусан, мобил иловада рўйхатдан ўтишда фойдаланувчининг телефон рақами ва унинг жисмоний шахснинг шахсий идентификация рақами (ЖШШИР) мос келиши текширилади.
Агар улар мос келмаса, мобил иловада рўйхатдан ўтишга рухсат берилмайди.
Бунда фойдаланувчига бу ҳақда SMS юборилади.
Банк картасини бириктириш алоҳида - ОТР-кодни киритиш ва биометрик идентификациядан ўтказиш орқали амалга оширилиши керак.
Агар фойдаланувчининг телефон рақами ва банк картаси орқали СМС-хабарномаларга уланган телефон рақами мос келмаса, унда картани улаш жараёни тўхтатилади.
Фақат фойдаланувчининг ўзига тегишли бўлган (яқин қариндошлари бундан мустасно) банк ҳисобварақлари, карталари ва электрон ҳамёнларини бириктиришга, шунингдек жисмоний шахслар ўртасида нақд пулсиз пул ўтказмаларини амалга оширишга йўл қўйилади.
Яқин қариндошларга қуйидагилар киради: ота-оналар, туғишган ва ўгай ака-укалар ва опа-сингиллар, эр-хотинлар, болалар (шу жумладан фарзандликка олинганлар), боболар, бувилар, неваралар, шунингдек, эр (хотин) нинг ота-оналари, ака-укалари ва опа-сингиллари.
Изоҳ