Жиноят ишлари бўйича Фарғона туман суди ёлланганликда гумон қилинган 28 ёшли Ўзбекистон фуқароси А.А.га нисбатан ҳукм чиқарди.
Иш ҳужжатларига кўра, А.А. Россия ҳудудида бўлганида, ўз ихтиёри билан Россия Федерацияси Қуролли Кучлари таркибига қўшилган, ҳарбий хизмат шартномасини имзолаган ва ғаразли ниятларда Украина ҳудудидаги жанговар ҳаракатларда қатнашган.
Суднинг аниқлашича, 2025 йил февраль ойида судланувчи Россия ҳуқуқ-тартибот идоралари томонидан миграция режимини бузгани учун ҳибсга олинган. Ҳужжатларни расмийлаштириш жараёнида унга Россия Қуролли Кучлари сафига қўшилиш таклиф қилинган, у депортация қилинишидан қўрқиб, бунга рози бўлган. 11 февраль куни у шартнома имзолаган ва Воронеж вилоятидаги ҳарбий қисмга юборилган, у ерда жанговар тайёргарликдан ўтган ҳамда ҳарбий жетон ва АК-12 автоматини олган.
2025 йил март ойида А.А. Украина ҳудудига ташланган ва у ерда жанговар ҳаракатларда қатнашган. Вазифаларни бажариш чоғида у кассетали ўқ-дори портлаши натижасида ўнг қўлидан осколкали жароҳат олган ва ҳарбий госпиталда даволанган. Соғайганидан кейин жанговар ҳаракатлар зонасида россиялик ҳарбий хизматчиларни озиқ-овқат билан таъминлаш билан боғлиқ топшириқларни бажаришда давом этган.
Судланувчи 2025 йил июль ойида Ўзбекистонга таътилга келган ва кейинчалик ИИБга чақирилиб, иқрорлик кўрсатмаларини берган.
Суд ҳукмига кўра, А.А. ЖКнинг 154-моддаси 1-қисми (ёлланиш) билан айбли деб топилиб, унга 3 йил муддатга озодликдан маҳрум қилиш жазоси тайинланди.
Изоҳ