Марказий банк Yangi bank'дан-банк фаолиятини амалга ошириш ҳуқуқини берувчи лицензияни қайтариб олди.
"Банк фаолиятида аниқланган камчиликларни бартараф этиш бўйича кўрилган чоралар етарли самара бермагани сабабли шундай қарорга келинди. Хусусан, устав капитали миқдори қонун ҳужжатларида белгиланган энг кам даражага етказилмаган, шунингдек, банклар ва банк фаолияти тўғрисидаги қонун ҳужжатларида назарда тутилган айрим талаблар бажарилмаган," - дейилади регулятор матбуот хизмати хабарида.
Шундай қилиб, 2025 йил 1 январдан бошлаб банк устав капиталининг энг кам миқдори 500 миллиард сўмни ташкил этиши керак. Бироқ, 2026 йил 1 январь ҳолатига кўра, "Янги банк" АЖ устав капитали 355 млрд сўмни ташкил этган.
Мазкур ҳолат юзасидан Марказий банк томонидан банк кузатув кенгаши ва бошқарувига устав капиталини белгиланган минимал даражага етказиш зарурлиги тўғрисида бир неча бор ёзма огоҳлантиришлар юборилган. Шунга қарамай, етарли амалий чоралар кўрилмаган.
Устав капиталининг минимал талабларга мувофиқ эмаслиги, шунингдек, "Банклар ва банк фаолияти тўғрисида"ги Қонуннинг 54-моддасига мувофиқ айрим молиявий операцияларни амалга оширишда белгиланган чекловларга риоя қилмаслик жиддий қоидабузарликлар деб эътироф этилади ва банк лицензиясини чақириб олиш учун асос бўлади.
Бундан ташқари, ушбу қонуннинг 77-моддасига кўра, банк учта кетма-кет чорак давомида регулятив капиталнинг 10 фоизидан ортиқ миқдорда зарар кўрганлиги ёки муддатидан қатъи назар регулятив капиталнинг 50 фоизидан ортиқ миқдорда зарар кўрганлиги, шунингдек бундай зарарларнинг юзага келиш хавфи мавжудлиги ҳам лицензияни чақириб олиш учун асос бўлади.
Ҳозирги вақтда тугатиш комиссияси тайинланган бўлиб, унга тугатиш жараёнини бошқариш ваколати берилган.
Алоҳида таъкидланишича, дастлабки ҳисоб-китобларга кўра, банкнинг 32 526 нафар омонатчисидан 32 153 нафар омонатчига кафолатланган омонат суммаси тўлиқ қайтарилади (омонатларни тўлаш бўйича аниқ ҳисоб-китоблар Омонатларни кафолатлаш агентлиги томонидан эълон қилинади).
373 нафар омонатчи бўйича кафолатланган маблағларнинг қолган қисми тугатиш комиссияси қарорига асосан қайтарилади.
"Ушбу масала Марказий банкнинг доимий назоратида. Жараён босқичма-босқич кузатиб борилади ва жамоатчилик мунтазам равишда хабардор қилинади," - дея таъкидлади Марказий банк.
Фуқаролар омонатлар бўйича компенсация тўловлари тўғрисидаги батафсил маълумотларни Омонатларни кафолатлаш агентлигининг +998 55 550-05-00 ишонч телефон рақами орқали олишлари мумкин.
Эслатиб ўтамиз, Тошкентдаги "Yangi bank" АЖ 2023 йил май ойида банк сифатида давлат рўйхатидан ўтган ва лицензия олган.
Изоҳ