Куни кеча ижтимоий тармоқларда жорий йилнинг 15 январидан бошлаб дорихоналарда антибиотиклар, синтетик антибактериал препаратлар ва тизимли таъсирга эга гормонал препаратлар қатъий электрон рецепт асосида берилиши ҳақида хабарлар тарқалди. Маълум қилинишича, бу DMED электрон тизимига ўтишнинг биринчи босқичи бўлади.
Соғлиқни сақлаш вазирлиги матбуот хизматининг маълум қилишича, юқорида кўрсатилган дори воситалари дорихоналарда ушбу тартибга мувофиқ - электрон рецепт бўйича берилмоқда.
Вазирликнинг эслатишича, Соғлиқни сақлаш вазирининг "Электрон рецепт" тизимини босқичма-босқич жорий этиш тўғрисидаги тегишли буйруғи 2025 йил 15 декабрда қабул қилинган.
Дастлабки босқичда антибиотиклар, тизимли таъсирга эга бўлган синтетик антибактериал дори воситалари, шунингдек, тизимли таъсирга эга бўлган гормонал дори воситаларини электрон рецепт асосида тайинлаш ҳамда дорихоналарда электрон рецепт асосида бериш тартиби белгиланди.
"Яъни, юқоридаги ҳужжат Адлия вазирлиги томонидан 2025 йил 15 декабрда рўйхатдан ўтказилган ва ушбу тартиб тарқатилаётган хабарларда айтилганидек, 2026 йил 15 январдан эмас, балки 2025 йил 16 декабрдан - буйруқ кучга кирган кундан бошлаб амал қила бошлайди," - дея хулоса қилди ССВ.
Аввалроқ, антибиотиклар, синтетик антибактериал ва гормонал дори воситаларини электрон рецепт асосида бериш электрон тизимни жорий этишнинг биринчи босқичи экани ҳақида хабар берган эдик. Келгусида мутахассисларнинг фикрлари ва аҳолининг эҳтиёжларини инобатга олган ҳолда электрон рецепт бўйича бериладиган дори воситалари рўйхати кенгайтирилади.
Изоҳ