Куни кеча озодликдан маҳрум қилинган диний блогер Мубашшир Аҳмаднинг саломатлиги оғирлашгани учун жазони ўтай олмаётгани айтилган хабар ижтимоий тармоқларга сиздирилди. Ушбу ҳолат юзасидан Олий Мажлиснинг Инсон ҳуқуқлари бўйича вакили (омбудсман)нинг Навоий вилоятидаги минтақавий вакили вилоятдаги 5-сонли жазони ижро этиш колониясига мониторинг ташрифини амалга оширди. Унда ушбу колонияда жазо муддатини ўтаётган маҳкум А.Т. (Мубашшир Аҳмад)нинг соғлиғи ва сақланиш шароити ўрганилди.
Мониторинг давомида маҳкумлар билан, шу жумладан маҳкум А.Т. билан ҳам ҳоли тарзда суҳбат ўтказилди ва унинг соғлиғига оид тиббий ҳужжатлар билан танишилди.
Унга кўра, А.Т. муассасада тиббий ёрдам кўрсатилишидан шикояти йўқлигини, мунтазам равишда тўлиқ тиббий текширувдан ўтказиб келинаётганлигини, фақатгина аввалдан мавжуд бўлган касалликлари туфайли соғлиғида бироз ўзгаришлар борлигини ва тегишли тиббий ёрдам олаётганлигини қайд этди.
Шунингдек, муассасада ўз хоҳишига кўра меҳнатга жалб этилганлиги (ошхона ишлари билан шуғулланади) ҳамда қонунчиликда белгиланган вақтлардан ташқари ортиқча меҳнатга жалб этилмаганлигини, иш шароити меҳнатни муҳофаза қилиш қоидаларига мувофиқ эканини айтиб ўтди.
"Озиқ-овқат таъминоти ва яшаш шароити бўйича ҳам шикоят билдирмади. Унинг сўзларига кўра, соғлиғидан келиб чиқиб, белгиланган норма бўйича озиқ-овқат берилади. Маҳкум А.Т. билан ўтказилган ҳоли тарздаги суҳбатда у ҳеч қандай масалада мурожаат қилмади," - дейилади хабарда.
Маълумот ўрнида, Омбудсманнинг Навоий вилоятидаги минтақавий вакили томонидан ушбу муассасага 2025 йилнинг ноябрь ва декабрь ойларида амалга оширилган мониторинг ташрифлари давомида ҳам маҳкум А.Т. томонидан мурожаатлар келиб тушмаган.
Эслатиб ўтамиз, диний блогер "Мубашшир Ахмад" ўтган йилнинг октябрь ойида суд томонидан жамоат хавфсизлигига таҳдид солувчи ва диний мазмундаги материалларни тарқатганликда айбланиб, 2,5 йил муддатга озодликдан маҳрум этилган эди.
Изоҳ