Сўнгги кунларда мамлакатда ҳарорат инверсияси билан боғлиқ ноқулай метеорологик шароитлар туфайли ҳаво сифатининг ёмонлашиши кузатилмоқда. Ҳолат юзасидан Экология ва иқлим ўзгариши миллий қўмитаси раиси ўринбосари Искандар Қутбиддинов маълумот берди.
Ушбу ҳодиса кундузги ва тунги ҳаво ҳарорати ўртасидаги кескин фарқ, айрим ҳолларда 14 даражага етиши, туман ҳосил бўлиши ва шамол тезлигининг пасайиши билан боғлиқ бўлиб, бу ифлослантирувчи моддаларнинг атмосфера ҳавосига тарқалишини қийинлаштиради.
Искандар Қутбиддиновнинг таъкидлашича, Махсус комиссия ўз фаолиятини тўхтатмаган. Аҳолини экологик вазият тўғрисида мунтазам хабардор қилиш билан бир қаторда тегишли ташкилотлар фаолиятини мувофиқлаштириш амалга оширилмоқда.
Айни пайтда Махсус комиссиянинг эътибори саноат ва хўжалик объектларида экологик рейдлар ва назорат тадбирларини ўтказишга қаратилган.
Ноқулай об-ҳаво шароитида атмосфера ҳавосига антропоген (инсон фаолияти билан боғлиқ) босимни камайтириш мақсадида корхоналарнинг иш қуввати чекланмоқда, айримларининг фаолияти эса вақтинча тўхтатилмоқда.
Жорий йилнинг 1-7 январь кунлари Тошкент шаҳридаги 12 та ва Тошкент вилоятидаги 22 та ишлаб чиқариш корхоналарида ўрганишлар ўтказилиб, тегишли чоралар кўрилди. Атмосфера ҳавосини ифлослантирган ўнлаб автотранспорт воситаларига нисбатан маъмурий чоралар кўрилди.
Шу билан бирга, профилактика чоралари ҳам амалга оширилмоқда: чиқиндилар манбалари мониторинги кучайтирилди, атмосфера ҳавоси сифатини тезкор баҳолаш амалга оширилмоқда.
Мутахассисларнинг таҳлилларига кўра, ноқулай об-ҳаво шароити 16-17 январь кунларига қадар сақланиб туриши кутилмоқда. Ёғингарчилик ва шамолнинг кучайиши билан кузатиладиган антициклонлар келиши билан атмосфера ҳавоси сифати нормаллашиши прогноз қилинмоқда.
"Ҳарорат инверсияси қисқа муддатли ва прогноз қилинадиган метеорологик ҳодиса ҳисобланади. Бу даврда давлат органлари кучайтирилган режимда ишлайди ва ифлосланишни камайтириш учун синовдан ўтган ва самарали чоралар қўлланилади.
Махсус комиссиянинг экологик рейдлари ва мониторинг тадбирлари инверсия даври тугагандан сўнг ҳам давом эттирилади. Кўрилаётган барча чора-тадбирлар юзага келаётган хавфларни минималлаштириш ва аҳолининг экологик хавфсизлигини таъминлашга қаратилган," - дея таъкидлади Искандар Қутбиддинов.
Изоҳ