Германия 10 млн евро тўлаш шарти билан Алишер Усмоновга нисбатан Ташқи иқтисодий фаолият тўғрисидаги қонунни бузганлик бўйича ишни тўхтатди, деб ёзади Reuters.
Тергов 2022 йилнинг апрель-сентябрь ойларида Бавариянинг Роттах-Эгерн қишлоғидаги иккита уйни қўриқлаш хизматлари учун 1,5 миллион евро миқдорида тўлов амалга оширилганига оид бўлган.
Прокуратура, шунингдек, А. Усмонов заргарлик буюмлари, расмлар ва виноларни Европа Иттифоқи санкциялари қоидаларига мувофиқ Германия Иқтисодиёт ва экспорт назорати федерал идорасига декларация қилмаганини таъкидлади. Миллиардер қонунбузарлик бўйича барча айбловларни рад этди.
А. Усмоновнинг адвокатлари унинг эҳтимолий тўловларда иштирок этган компаниялар билан алоқаси йўқлигини, шунингдек, кўрсатилган кўчмас мулк объектларига эгалик қилмаганини ва уларни назорат қилмаганини таъкидлаб, Европа Иттифоқи санкциялари ушбу терговга тўғридан-тўғри тааллуқли эмаслигини қўшимча қилди.
Бизнесмен пул бадалини ўтказишни аллақачон буюрган. 8,5 миллион евро давлатга, яна 1,5 миллион евро Opferhilfe Bayern фондига, шунингдек, маҳбуслар ва пробация бўйича Бавария ер иттифоқига тушиши керак.
Шу билан бирга, адвокатлар пул бадали эвазига ишни тугатиш айбга иқрорлик ҳисобланмаслигини ва айбсизлик презумпциясига таъсир қилмаслигини таъкидладилар.
Мюнхен прокуратураси, ўз навбатида, пул бадали жарима ҳам, жиноий жазога тенглаштирилган бошқа чора ҳам эмаслигини таъкидламоқда.
"Тўлов амалга оширилгандан сўнг, худди шу тахмин қилинган ҳолатлар бўйича унга қарши терговни давом эттиришнинг имкони бўлмайди," - дейилади Мюнхен прокуратураси баёнотида.
Изоҳ