АҚШда радикал фаол Чарли Кирк Юта университетида нутқ сўзлаётганида отиб ташланди. Бироз вақт ўтгач, у шифохонада вафот этди, дея тасдиқлади АҚШ президенти Дональд Трамп.
Кирк таниқли подкастер ва Turning Point USA (TPUSA) ижрочи директори ҳисобланади. У Трамп сиёсатини қўллаб-қувватлаши билан танилган, унинг ташкилоти талабалар орасида консерватив қарашларни тарғиб қилиш билан шуғулланади.
Кирк вакилининг сўзларига кўра, у ўқотар қуролдан яраланган. Тадбирдан эълон қилинган видеода оқ йиғма чодир остидан оломонга мурожаат қилаётган Киркка ўқ узилгани, эркак бўйнидан яралангани акс этган.
Кирк нутқ сўзлаган университет баёнотида айтилишича, отишма кундуз соат 12:20 атрофида содир бўлган. "Кампус кун охиригача ёпиқ, полиция гумонланувчини қўлга олди," - деди университет вакиллари. Бироқ кейинроқ улар ўқ узган шахс қўлга олингани ҳақидаги маълумотни рад этишди. Дастлаб қўлга олинган эркак қўйиб юборилган.
Киркни қўллаб-қувватловчи баёнотларни бир қанча нуфузли республикачилар, жумладан, мудофаа вазири Пит Хегсет, вице-президент Жей Ди Венс, шунингдек, президент Доналд Трампнинг ўзи берди.
Изоҳ