Сурхондарё вилояти Ички ишлар бошқармаси ҳамда Давлат хавфсизлик хизмати ходимлари томонидан 2000 йилда туғилган шахснинг Бойсун тумани “Дарбанд” маҳалласида вақтинча истиқомат қилувчи хонадони кўздан кечирилган.
Аниқланишича, у 2023 йил март ойидан шу кунга қадар тўққиз нафар шахсларга моддий манфаат эвазига ҳужра шароитида диний таълим бериб келаётганлиги маълум бўлди.
Қайд этилишича, ушбу шахс таълим бериш давомида болаларга ўта қўпол муомалада бўлиб, уларни аёвсиз калтаклаган. Болаларнинг юзи ва баданида моматалоқ излар аниқланган.
Ҳозирда вояга етмаганларнинг тан жароҳатлари оғирлик даражасини аниқлаш мақсадида суд-тиббий экспертизаси тайинланиб, уларнинг ота-оналарига нисбатан Маъмурий жавобгарлик тўғрисидаги кодекснинг 47-моддаси биринчи қисми билан ҳужжатлар расмийлаштирилди.
Шунингдек, Наманганда ўтказилган тадбирда эса 1967 йилда туғилган, Янги Наманган тумани “Мустақилликнинг 5 йиллиги” маҳалласида яшовчи шахснинг ноқонуний ҳаракатларига чек қўйилди.
У 2023 йилнинг июль ойи бошларидан ҳозирга қадар хонадонида 17 нафар вояга етмаган шахсларнинг ҳар биридан 100 АҚШ долларидан моддий манфаат эвазига ҳужра шароитида диний таълимдан сабоқ бериб келаётганлиги аниқланган.
Мазкур ҳолат юзасидан Маъмурий жавобгарлик тўғрисидаги кодекснинг 241-моддасига асосан ҳужжатлар расмийлаштирилиб, терговга қадар текширув ҳаракатлари ўтказилмоқда.
Ноқонуний диний таълим олган 17 нафар вояга етмаганларнинг ота-оналарига нисбатан Маъмурий жавобгарлик тўғрисидаги кодекснинг 47-моддасига мувофиқ жазо чоралари қўлланилган.
Изоҳ