АҚШга ноқонуний йўллар билан кетган 119 нафар ўзбекистонлик ватанга қайтарилди, дея хабар бермоқда UzReport телеканали Ташқи меҳнат миграцияси агентлигига таяниб.
Маълумотларга кўра, 2021 йилнинг октябридан 2023 йилнинг октябрига қадар АҚШда чегарани ноқонуний кесиб ўтишга уринган 13 мингдан ортиқ Ўзбекистон фуқароси қўлга олинган.
Ўзбекистонга қайтган фуқаронинг айтишича, унга айтилган катта ваъдалар саробга айланган. У 2-3 йилда топган пулини 2 ойда кўчага ташлаб келган. Мексикага қадар 30 кун йўл босган. Америкага ўтказиб қўйиш учун ундан 5 минг доллар сўрашган.
Бошқа фуқаронинг сўзларига кўра, у АҚШда ошпазлик қилмоқчи бўлган. Аммо, АҚШда қўлга олинган ва 4 ой давомида қамоқхонада сақланган.
Бошқа бир фуқаро эса у ерларда иш топиш қийин эканлигини, ҳатто 3-4 ойлаб ишсиз қолиб кетаётган аёллар борлигини маълум қилган. Унинг маълум қилишича, Америкада асосан Марказий Осиё давлатлари фуқаролари учун рейдлар бошланган.
