Ижтимоий тармоқларда янгийўллик ҳомиладор аёлнинг шифохонада вафот этгани ҳақида хабарлар тарқалди. Марҳуманинг эри видеомурожаат йўллаб, ҳеч қайси шифокорларга ишонмаслигини билдирди.
"13 ноябрь куни соат 7:30 да шифохонага бордик. УТТга тушди. УТТда ҳаммаси яхши, оғриқларига ётади дейишди. Уч-тўрт кунда чиқиб кетади. Ётқиздим. Ўша куни кечки пайт болам ва онамни олиб, кўргани бордик. Шифохонадан ўз оёғи билан юриб чиқди. Кечки пайт ўнда телефон қилди, операцияга дори керак деди. Бориб олиб келдим. Ошқозонини ювамиз дейишди. Шундан сўнг, ярим соатдан кейин юраги тўхтаган. Ўша пайтда ҳам менга дори ёзиб беришди. Бир оғиз айтишмабди. Мени ҳаммаси яхши деб алдаб ўтиришган. Онанинг юраги тўхтаганда ҳам кислород қоладию, болани сақлаб қолса бўларди-ку", — дейди марҳуманинг турмуш ўртоғи.
Унинг маълум қилишича, марҳума 30 ноябрда 26 ёшга тўлар эди.
"Буларга қаттиқ чора кўриш керак. Керак бўлса, қамаш лозим. Ўғлим эртага онам қани деганда, жавоб беролмайман", — дейди у.
Мазкур ҳолат юзасидан Тошкент вилояти соғлиқни сақлаш бошқармаси расмий муносабат билдирди.
Хабарга кўра, 1997 йилда туғилган ҳомиладор аёл М.Қ. Янгийўл шаҳридаги туғуруқ муассасасига шаҳар кўп тармоқли марказий поликлиникаси йўлланмаси билан мурожаат қилган ва 2023 йилнинг 14 ноябрь куни “Ҳомиладорлик-2, 31-32 ҳафта, муддатидан аввалги туғуруқ хавфи” ташхиси билан қабул қилинган.
Марказда бемор зарур текширувлардан ўтказилиб, даво чоралари олиб борилган. Шу куни кечқурун аёлда кўнгил айниши ва қайт қилиш ҳолати кузатилган. Бемор ушбу ҳолатни сомса ва салат ейиши билан боғлаган. Инфекционист ва хирург кўриклари ташкил этилиб, ошқозон-ичак фаолияти бузилиши қайд қилинган. УТТ текширувида бачадон нормотонусда, жигар ва ўт пуфаги фаолияти нормал экани ташхисланган.
Шундан сўнг, ҳомиладор аёл ундан хабар олгани келган турмуш ўртоғи билан учрашган.
Палатага қайтгандан сўнг кутилмаганда аёлнинг аҳволи оғирлашиб, ҳушидан кетган. Кўрсатилган реанимацион шошилинч тиббий ёрдам чораларига қарамай, беморда биологик ўлим ҳолати юз берган.
Суд-тиббиёт экспертизаси дастлабки хулосасига кўра, марҳумада ҳомиладорликка алоқадор бўлмаган нейрофиброматоз хасталиги асоратлари оқибатида талоқ артериясининг, ичак тутқич томирларининг спонтан ёрилиши тўсатдан ўлим ҳолатига олиб келган.
Маълумотларга кўра, артерияларнинг тўсатдан ёрилиши – наслий хасталик ҳисобланган нейрофиброматоз (Реклингхаузен синдроми)нинг асорати бўлиб, аксарият ҳолатларда ўлим билан якунланади.
Ҳолат юзасидан ҳуқуқни муҳофаза қилувчи органлар суриштирув олиб бормоқда.