Шавкат Мирзиёев Туркиянинг Анталья шаҳрида бўлиб ўтган БМТнинг Иқлим ўзгариши бўйича конвенцияси томонларининг 31-конференцияси (COP31) доирасида Жаҳон етакчилари саммитининг ялпи сессиясида нутқ сўзлади.
Унда дунёнинг 90 дан ортиқ мамлакати давлат ва ҳукумат раҳбарлари, етакчи халқаро ташкилотлар ҳамда молия институтлари вакиллари иштирок этди.
Президент иқлим ўзгариши билан боғлиқ муаммоларга якка ҳолда мослашишнинг имкони йўқлигини таъкидлади.
«Марказий Осиёда музликлар эриши, сув танқислиги ва кучли қурғоқчилик каби таҳдидлар кўлами ортиб бормоқда. Бу умумий муаммолар минтақадаги давлатлардан биргаликда ҳаракат қилишни талаб этади», — деди давлат раҳбари.
Шу муносабат билан минтақавий иқлим интеграцияси моделини ривожлантириш ташаббуси илгари сурилди. Ҳамкорликни учта асосий йўналишда бошлаш таклиф қилинди.
Биринчи йўналиш — ахборот алмашинуви. Жаҳон метеорология ташкилоти кўмагида иқлим хавфлари ҳақидаги маълумотлар алмашинуви инфратузилмасини яратиш таклиф этилди.
Иккинчи йўналиш — технологиялар. «ЭКО-ЭКСПО» кўргазмасини минтақа шароитига мос замонавий экологик ечимларни тақдим этувчи доимий инвестициявий-технологик майдонга айлантиришга тайёрлик билдирилди.
Учинчи йўналиш — молиялаштириш. Ривожланиш банклари ва мақсадли жамғармалар билан имтиёзли грантлар, шунингдек, «яшил» эмас, балки «кўк» ва «арид» молиялаштириш механизмларини ўз ичига олган янги қўллаб-қувватлаш воситаларини ишлаб чиқиш таклиф қилинди.
Нутқи якунида Шавкат Мирзиёев конференция иштирокчиларини иқлим интеграцияси ғоясини амалий мазмун билан бойитишга чақирди. Шунингдек, ушбу муҳим моделни дунёнинг ҳамкорликка тайёр бўлган бошқа минтақаларида ҳам қўллашни таклиф этди.
Изоҳ