ДХХ матбуот хизмати маълумотига кўра, Андижон вилояти Пахтаобод тумани ҳокими ўринбосари ва Давлат кадастрлари палатаси туман филиали мансабдор шахси ўзаро тил бириктириб, тадбиркорлик фаолияти билан шуғулланмоқчи бўлган фуқаронинг ишончига кирган.
Улар туман ҳокимлиги захирасида бўлган 50 сотих ер майдонини онлайн-аукцион орқали арзон нархда сотиб олишга кўмаклашиш ва уни тадбиркор номига расмийлаштириб бериш эвазига 100 минг доллар талаб қилган.
ДХХ ва Бош прокуратура ҳузуридаги департамент ходимлари ҳамкорлигида ўтказилган тезкор тадбирда мансабдор шахслар олдиндан келишилган пулнинг 30 минг долларини воситачи орқали олаётган вақтида қўлга олинган.
Ҳозирда уларга нисбатан Жиноят кодексининг 168-моддаси 4-қисми «а» ва «г» бандлари (фирибгарлик), шунингдек, 28-модда орқали 211-модда 3-қисми «а» банди (ўта кўп миқдорда пора беришда иштирокчилик) билан жиноят иши қўзғатилган. Тергов ҳаракатлари олиб борилмоқда.
Изоҳ