Марказий банк: Ўзбекистонда аҳолининг кредитларга талаби юқори даражада қолмоқда

Жорий йилнинг II чорагида Ўзбекистон аҳолисининг кредитларга бўлган эҳтиёжи юқори даражада сақланиб қолди. Бу ҳақда Марказий банк шарҳида айтилган.

Кредитларга энг юқори эҳтиёж ойига 3–10 млн сўм даромад оладиган аҳоли орасида кузатилмоқда. Ушбу даромад гуруҳларида сўровда қатнашганларнинг 57–59 фоизи қарз маблағларига бўлган эҳтиёж ошишини кутмоқда.

15–20 млн сўм даромад оладиганлар гуруҳида респондентларнинг 44 фоизи кредитларга бўлган эҳтиёж ошишини кутаётган бўлса, 20 млн сўмдан ортиқ даромад олувчилар орасида бу кўрсаткич 53 фоизни ташкил этган.

Аҳоли кредитларни асосан уй-жойни таъмирлаш, таълим ва бошқа эҳтиёжлар учун йўналтиришни режалаштирмоқда.

Шунингдек, тўйлар, автомобиль хариди ва даволаниш билан боғлиқ харажатлар барча даромад гуруҳларида деярли бир хил даражада сақланиб қолмоқда ва кредит маблағларидан фойдаланишнинг муҳим йўналишларидан бири бўлиб қолмоқда.