Иқтисодиёт ва молия вазирлиги фуқароларнинг пенсия ёшини 2028 йил 1 январдан бошлаб босқичма-босқич оширишни таклиф қилмоқда. Тегишли лойиҳа жамоатчилик муҳокамаси учун эълон қилинган.
Ҳужжатда айтилишича, мазкур ташаббус Иқтисодиёт ва молия вазирлиги ҳамда Президент ҳузуридаги Ижтимоий ҳимоя миллий агентлиги томонидан фуқароларнинг пенсия тизимида иштирок этиш муддати ва пенсия олиш даври ўртасидаги мутаносибликни таъминлаш, шунингдек, умр кўриш давомийлигининг ортиб боришини ҳисобга олиш мақсадида таклиф этилган.
Шундай қилиб, 2028 йил 1 январдан пенсия ёшини ҳар йили уч ойга оширишни бошлаш ва уни 2039 йилга келиб эркаклар учун 63 ёш, аёллар учун 58 ёшга етказиш таклиф қилинмоқда. Ҳозирда эркаклар учун пенсия ёши 60 ёшни (25 йил иш стажи мавжуд бўлганда), аёллар учун эса 55 ёшни (20 йил иш стажи мавжуд бўлганда) ташкил этади.
Шунингдек, 2027 йил 1 январдан умумий белгиланган пенсия ёшидан бир йил олдин пенсия тайинлаш тартибини бекор қилиш таклиф этилмоқда.
Бунда пенсия ёшини ошириш даврида пенсия олди ёшидаги фуқароларга қуйидагилар кафолатланади:
- пенсия олди ёшига етгани сабабли ишдан бўшатиш ёки ишга қабул қилишни рад этишни тақиқлаш;
- расман ишсиз деб эътироф этилган фуқароларнинг белгиланган муддатдан икки йил олдин муддатидан илгари пенсияга чиқиш ҳуқуқини сақлаб қолиш;
- тўлиқ иш кунида ер ости ишларида, шунингдек, зарарли ва оғир меҳнат шароитларида банд бўлган эркакларнинг 50–55 ёшда, аёлларнинг эса 45–50 ёшда қонунчиликда белгиланган тартибда имтиёзли пенсияга чиқиш ҳуқуқини сақлаб қолиш;
- пенсионерлар учун амалдаги солиқ, транспорт ва соғлиқни сақлаш соҳасидаги имтиёзларни сақлаб қолиш;
- 60 ёшдан бошлаб эркакларга, 55 ёшдан бошлаб аёлларга жамғариб бориладиган пенсия тизими доирасида тўпланган маблағларни олиш ҳуқуқини бериш.
Лойиҳа муҳокамаси 30 сентябргача давом этади.
Изоҳ