Польшалик сузувчи Бартломей Кубковскийтарихда биринчи бўлиб Болтиқ денгизини Швециядан Польшагача сузиб ўтди. У 160 километр масофани 55 соатда босиб ўтди. Сузиш давомида ўта чарчоқ сабабли спортчида галлюцинациялар кузатилди.
Польшалик сузувчи Бартломей Кубковский тарихда биринчи инсон сифатида Болтиқ денгизини Швециядан Польшага сувдан чиқмасдан ва ҳамроҳлик қилган қайиққа тегмасдан кесиб ўтишга муваффақ бўлди. У тахминан 160 километрлик йўналишни 55 соатда босиб ўтди. Бу Кубковский учун бешинчи уриниш эди.
31 ёшли спортчи 31 июль куни Швециянинг Касеберга қишлоғидан йўлга чиқиб, 2 август оқшомида Польшанинг Дзивнув шаҳри соҳилига етиб келди. Икки суткадан ортиқ вақт давомида у дам олмади ва кучли тўлқинлар, шамол ҳамда совуқ сувга қарамай, ҳамроҳлик қилган қайиққа бирор марта ҳам тегмади.
Сузиш вақтида спортчида галлюцинациялар кузатилди
Озиқ-овқат ва ичимликлар унга қайиқдан узун таёқлар ёрдамида узатиб турилди. Спортчи жамоасининг маълум қилишича, иккинчи кечада ўта кучли чарчоқ оқибатида унда галлюцинациялар пайдо бўлган. Шунга қарамай, у сузишни муваффақиятли якунлади ва Польша соҳилида уни кўплаб мухлислар кутиб олди.
Ultra Baltic Swim деб номланган ушбу экстремал сузиш нафақат спорт ютуғи, балки хайрия мақсадида ҳам ташкил этилди. Акция давомида онкологик касалликларга қарши курашни қўллаб-қувватловчи Cancer Fighters жамғармаси учун тахминан 185 минг евро маблағ йиғилди.
Изоҳ