Бу сафарги Жаҳон чемпионати тарихда ўзига хос ўрин эгаллайди. АҚШ, Канада ва Мексика мезбонлик қилган мундиал нафақат уч мамлакатда ўтказилган илк жаҳон чемпионати, балки 48 та терма жамоа иштирок этган биринчи мусобақа сифатида ҳам тарихга кирди. Турнир бошланишидан олдин кўплаб мутахассислар ва мухлислар янги формат футбол сифатига салбий таъсир қилиши, кучсиз жамоалар сони ортиши ва ўйинлар қизиқарлилигини йўқотиши ҳақида хавотир билдиришганди. Аммо бир ойдан ортиқ давом этган мусобақа бу фикрларнинг катта қисмини инкор этди.
Янги формат ўзини оқладими?
ФИФАнинг 48 жамоали форматга ўтиш қарорини ҳамма ҳам бирдек қабул қилмаган эди. Бироқ амалда бу қарор футбол географиясини янада кенгайтирди. Илгари мундиалга чиқиши қийин бўлган қатор мамлакатлар ўз мухлисларига тарихий байрам улашди.
Энг муҳими, кўпчилик кутганидек бир томонлама ўйинлар кўпайиб кетмади. Аксинча, кичик саналган терма жамоалар катта футбол давлатларига муносиб қаршилик кўрсатди. Кабо-Верде, Кюрасао, Марокаш, ДР Конго каби жамоаларнинг ўйинлари турнирнинг энг катта сюрпризларидан бирига айланди. ФИФА Техник тадқиқот гуруҳи ҳам жамоалар ўртасидаги фарқ йилдан-йилга қисқараётганини таъкидлади.
Янги қаҳрамонлар кашф этилди
Ҳар бир Жаҳон чемпионати янги юлдузларни кашф этади. 2026 йилги мундиал ҳам бундан мустасно бўлмади. Катта клубларда ўйнайдиган футболчилар билан бир қаторда илгари кенг оммага яхши танилмаган ўйинчилар ҳам ўзини кўрсата олди.
Ўзбекистон терма жамоаси ҳимоячиси Абдуқодир Ҳусановнинг жисмоний кўрсаткичлари бутун дунё эътиборини тортди. У турнирда 36,46 км/соат тезлик қайд этиб, Жаҳон чемпионатининг энг тезкор футболчилари рейтингида олтинчи ўринни эгаллади. Бу эса ўзбек футболининг халқаро майдондаги нуфузини янада оширди.
Сюрпризлар мундиали
Бу чемпионатда номдор терма жамоалар ҳам осон ютиш имконига эга бўлмади. Ҳар бир учрашувда интрига сақланиб қолди. Гуруҳ босқичидаги кутилмаган натижалар, плей-оффдаги драматик баҳслар ва пенальтилар сериясигача етиб борган учрашувлар футбол мухлисларига унутилмас лаҳзаларни тақдим этди.
Шу билан бирга Испаниянинг чемпионликкача босиб ўтган йўли, Аргентинанинг яна бир финали, Англиянинг бронза учун жангдаги ғалабаси ва Франциянинг кучли ўйини турнир савиясини янада оширди.
Камчиликлар ҳам бўлди
Албатта, ҳаммаси ҳам идеал кечмади. 48 жамоали формат туфайли мусобақа 104 та учрашувга чўзилди. Бу эса турнир давомийлигини оширди ва айрим мухлислар учун барча ўйинларни кузатишни қийинлаштирди.
Бундан ташқари, АҚШдаги ёзги иссиқ об-ҳаво сабаб айрим баҳсларда мажбурий сув ичиш танаффуслари жорий этилди. Финалдаги шоу дастури ва айрим америкалик услубдаги янгиликлар эса анъанавий футбол мухлислари ўртасида баҳсларга сабаб бўлди.
Энг муҳим хулоса
2026 йилги Жаҳон чемпионати футболнинг ҳақиқатан ҳам глобал ўйинга айланганини яна бир бор исботлади. Янги формат кўпчилик кутгандек мусобақа сифатини пасайтирмади. Аксинча, кўпроқ мамлакатларга ўзини кўрсатиш имконини берди, янги қаҳрамонларни кашф этди ва интригага бой учрашувларни тақдим қилди.
Балким бу мундиал тарихда энг мукаммал Жаҳон чемпионати сифатида эсда қолмас. Аммо у футболнинг келажаги қандай бўлишини кўрсатиб берган, янги даврга йўл очган мусобақа сифатида узоқ йиллар эслаб юрилади. 48 жамоали форматга бўлган шубҳалар эса катта қисми билан майдоннинг ўзидаёқ ўз жавобини топди.
Жаҳонгир Сотволдиев
Изоҳ