“Тюнинг” устахоналарида автомобилларни рухсатсиз қайта жиҳозлашга қарши назорат тадбирлари кучайтирилди, дея хабар бермоқда Тошкент шаҳар ИИББ ЙҲХХ матбуот хизмати.
"Тюнинг" хизматларини таклиф этиб, ўз ишларини, хусусан, Инстаграм тармоқларига жойлаб бораётган устахоналар фаолияти ҳар томонлама ўрганиб чиқилмоқда. Улар томонидан махсус рухсатномалар орқали ўрнатилиши талаб этиладиган жиҳозларни транспорт воситаларига ўрнатиш ортидан бир қатор қонунбузилиш ҳолатлари келиб чиқаётгани тушунтириб ўтилмоқда.
Қайд этилишича, Шайхонтоҳур тумани Нурафшон кўчасида жойлашган автомобилларга сервис хизмат кўрсатиш марказида BMW русумли транспорт воситасининг кузов қисмига рухсатномасиз плёнка (қоплама) тортилгани ва ушбу BMW автомашинасининг глушитель қисми конструкцияси ўзгартирилгани аниқланган. Ушбу автомобиль вақтинча сақлаш учун жарима майдончасига олиб кетилган.
Шунингдек, Мирзо Улуғбек туманида жойлашган автомобилларга сервис хизмат кўрсатиш марказига борилиб, у ерда ҳам текширув ўтказилган.
Марказ ходимининг айтишича, илгари пул тўланса, исталган одамнинг машинасига рухсат этилмаган сирена ва мигалка қурилмаларини ўрнатиб беришган.
“Хунук қилиб айтганда, бизга пулини берса бўлди-да. Пулини берарди, ўша сўраган нарсасини ўрнатиб берардик. Лекин ҳозирги кунда кўряпмиз, вазият жуда нотинч. Кўрдингиз, кечаги воқеани. Бечора инспектор оламдан ўтдилар.
Праваси бор ёки йўқлигини билмасдим, лекин ёш болалар келарди. Мигалка, сирена сўрарди. Биз эса пулини олиб, ҳаммасини қилиб берганмиз. Мана энди тушундимки, бу жуда хунук иш экан.
Махсус машиналар келса, албатта, ўрнатиб берамиз. Лекин оддий одамларга бу нарсани ўрнатишга қаршимиз. Чунки ўша инспектор ўрнида бизнинг яқинларимиз ҳам бўлиши мумкин эди”, — дейди ходим.
Изоҳ