Global Firepower таҳлилий маркази томонидан тузилган дунёнинг энг кучли армиялари рейтингида Ўзбекистон Қуролли Кучлари 145 та армия орасида 53-ўринни эгаллади.
Бу кўрсаткич мамлакат армияси 58-ўринда бўлган ўтган йилга нисбатан 5 поғонага юқори.
Global Firepower ҳисоб-китобларига кўра, мамлакат аҳолисининг умумий сони 36,5 миллион кишидан ошади, улардан қарийб 19 миллиони арзон ишчи кучи ва сафарбарлик кучи тоифасига киради. 15,9 миллиондан ортиқ киши ҳарбий хизматга яроқли деб топилди, бу кўрсаткич бўйича Ўзбекистон 145 мамлакат орасида етакчи ўринни эгаллади (32-ўрин).
Амалдаги шахсий таркиб сони бўйича Ўзбекистон 120 мингга яқин ҳарбий хизматчига эга. Асосий қисми қуруқликдаги қўшинларда (95 мингга яқин киши), қолганлари авиацияда тўпланган.
Маълумотларга кўра, Ўзбекистон Қуролли Кучларида жами ҳаво кемалари сони 159 тани ташкил этади. Шу билан бирга, авиация паркининг тайёргарлик кўрсаткичи 87 бирликка етади. Ҳарбий ҳаво кучлари таркибида 101 та вертолёт мавжуд бўлиб, бу бутун авиация паркининг 63 фоиздан ортиғини ташкил қилади. Ушбу кўрсаткич бўйича Ўзбекистон юқори ўринларни эгаллаб турибди (145-ўриндан 36-ўрин).
Қайд этилишича, 34 та зарба берувчи вертолёт мавжуд бўлиб, улардан 19 таси жанговар шай ҳолатда (145 та вертолёт ичида 20-ўрин).
Мамлакат қуролланишида 470 та танк бўлиб, улардан 259 таси жанговар шай ҳолатда (30-ўрин). Зирҳли техникаларнинг умумий сони 8 692 тани ташкил этиб, шундан 4 781 таси фойдаланишга тайёр деб топилган.
Артиллерия кучлари таркибида 177 та ўзиюрар артиллерия қурилмалари мавжуд бўлиб, улардан 97 таси жанговар шай ҳолатда (23-ўрин), 236 та шатакка олинадиган артиллерия қуроллари, улардан 130 таси фойдаланишга тайёр (43-ўрин) ва 108 та баравар ўт очиш реактив тизимлари мавжуд.
Марказий Осиё давлатлари орасида Ўзбекистон етакчилик қилмоқда. Кейинги ўринда 58-ўринни эгаллаган Қозоғистон турибди. Туркманистон 78-ўринни, Тожикистон 100-ўринни, Қирғизистон 109-ўринни эгаллади.
Рейтингда ўтган йилгидек АҚШ армияси етакчилик қилди, иккинчи ўринда Россия, учинчи ўринда Хитой.
Изоҳ