Аввалроқ ижтимоий тармоқларда пойтахтнинг Яшнобод туманида яшовчи Арсен Аванесян ўз маблағлари ҳисобидан темир йўл бўйидаги ташландиқ майдонни ободонлаштирилган яшил ҳудудга айлантиргани ва ер қонунчилигини бузгани учун жаримага тортилгани ҳақида хабарлар тарқалган эди. Маълум қилинишича, унга участкани асл ҳолатига қайтариш буюрилган ва жарима миқдори 82,4 млн сўмни ташкил этган.
Ҳокимлик ҳодисага изоҳ бериб, жарима дарахт ва буталар экилгани учун эмас, балки ноқонуний қурилиш ишлари ва ҳудудга эркин киришни чеклаш учун қўлланилганини маълум қилди.
Хусусан, эркак 360 кв.м майдонда ўзбошимчалик билан темир панжара ўрнатган, 70 кв.м майдонда рухсат этилмаган умумий овқатланиш шохобчаси сифатида фойдаланилган соябон ўрнатган ва ноқонуний тижорат фаолияти учун жой жиҳозлаган.
Шу билан бирга, экилган дарахт ва буталар жойида қолиши, уларни кесиш бўйича ҳеч қандай иш олиб борилмаслиги таъкидланди. Арсен Аванесян томонидан яратилган барча ободонлаштирилган ҳудудлар маҳалла қиёфасининг бир қисми сифатида сақлаб қолинади.
Ҳокимлик, шунингдек, фуқароларнинг яшил ҳудудларни яратиш бўйича ташаббуслари қўллаб-қувватланишини, бироқ ҳудудлар умумий фойдаланиш учун очиқ бўлиши ва қонунга мувофиқ расмийлаштирилиши кераклигини эслатди.
Қайд этилишича, тижорат фаолиятини амалга ошириш учун ер участкалари расмий равишда: E-auksion электрон савдо платформаси орқали, онлайн аукцион орқали сотиб олиш ёки my.gov.uz портали орқали ижарага берилиши керак. Ҳар қандай ўзбошимчалик билан қурилиш юридик ва молиявий хавфларни келтириб чиқаради: мулкдор ҳисобидан бузилиш, сотиш ёки топширишнинг иложи йўқлиги, жарималар ва коммуникация муаммолари.
Изоҳ