Ҳиндистоннинг "Dr. Reddy’с Laboratories" халқаро фармацевтика компанияси "Телсартан Н" дори воситасининг алоҳида сериясини муомаладан қайтариб олади, дея хабар бермоқда Фармацевтика маҳсулотлари хавфсизлиги маркази.
Фармацевтика компаниясининг таъкидлашича, ишлаб чиқарувчи томонидан ўтказилган сифат назорати ва барқарорлик синовлари натижаларига кўра, C2501976 серияли "Телсартан Н 80 мг / 12,5 мг" дори воситасида таъсир этувчи модда - гидрохлортиазиднинг белгиланган меъёрий кўрсаткичлардан оғиши аниқланган.
Ушбу ҳолат дори воситасининг сифат хусусиятларига қўйиладиган талабларга жавоб бермаслиги сифатида баҳоланади.
Шу билан бирга, таъкидланишича, Ўзбекистон ҳудудида муомалага киритилган C2501977-сериясида таъсир қилувчи модда таркиби бўйича бундай номувофиқликлар аниқланмаган.
Бироқ, кўрсатилган серия номувофиқлиги аниқланган серия билан бир хил ишлаб чиқариш лотининг таъсир қилувчи моддасидан фойдаланган ҳолда ишлаб чиқарилганлиги сабабли, дори воситалари муомаласи хавфсизлигини таъминлаш ва юзага келиши мумкин бўлган хавфларнинг олдини олиш мақсадида ушбу серия профилактика тартибида бозордан олиб қўйилмоқда.
Юқорида кўрсатилган сериядаги "Телсартан Н 80 мг/12,5 мг" дори воситасини харид қилган фуқароларга уни истеъмол қилишдан тийилиш, дори воситаси мавжуд бўлса, ундан фойдаланмаслик тавсия этилади. Зарур бўлса, муқобил дори воситасини танлаш учун даволовчи шифокор билан маслаҳатлашиш керак.
Изоҳ