Эслатиб ўтамиз, қуръа натижаларига кўра, Ўзбекистон терма жамоаси К гуруҳидан жой олган бўлиб, у ерда Португалия, Колумбия, шунингдек, Ямайка, Янги Каледония ва Конго ДР ўртасидаги қитъалараро плей-офф ғолибига қарши баҳс олиб боради.
Deportes RCN’га берган интервьюсида Каннаваро Ўзбекистон терма жамоасининг жаҳон чемпионатидаги дебюти вазифани қийинлаштиришини таъкидлади. Жамоа нафақат рақибларнинг юқори даражасига, балки ички чекловларга ҳам дуч келмоқда. "Биз жуда қийин гуруҳга тушиб қолдик: Португалия, Колумбия... Ассоциациямиз учун бу жаҳон чемпионатидаги илк иштирок ва мусобақага тайёргарликнинг ўзи катта тажрибадир," - деди италиялик футболчи.
У миллий чемпионатдаги ҳолатни алоҳида таъкидлаб ўтди: "Лигадаги ўйинлар шиддати ҳали топ даражадан анча узоқ. Буни яхшилаш керак. Аммо мамлакат учун жаҳон майдонига чиқишнинг ўзи тарихий қадамдир."
Қоғозда Португалиядан кейин энг жиддий кўринадиган рақиб ҳақида гапирар экан, Каннаваро Колумбия терма жамоасининг кучли томонларини қайд этди. "Колумбия - кучли жамоа: уларда тезлик, техника, юқори интенсивлик ва истеъдод бор. Бу жуда юқори савияли терма жамоа ва уларга қарши ўйин осон бўлмайди."
Каннаваро Ўзбекистон терма жамоаси қандай йўл тутишини ҳам айтиб ўтди: "Бундай рақибларга қарши индивидуал ҳаракатлар иш бермайди. Ягона механизм сифатида ҳаракат қилишимиз керак. Футбол - бу жамоавий ўйин ва фақат шу йўл билан биз Колумбия ва Португалияга ниманидир қарши қўйишимиз мумкин."
Эслатиб ўтамиз, Ўзбекистон терма жамоасининг 2026 йилги жаҳон чемпионатидаги дастлабки ўйини 18 июнь куни Колумбияга қарши ўтказилса, 23 июнь куни терма жамоа Португалияга қарши майдонга тушади.
Изоҳ