Халқаро тест агентлиги (ITA) бокс бўйича Олимпия ўйинлари чемпиони Лазизбек Мулложоновни уч йилга мусобақалардан четлаштирди, деб хабар бермоқда ИТА матбуот хизмати.
Мусобақадан ташқари даврда олинган намуна тақиқланган модда - метастерон метаболитлари учун ижобий натижа берди.
Метастерон Бутунжаҳон антидопинг агентлигининг тақиқланган рўйхатига киритилган ва С1.1 - анаболик андроген стероидлар тоифасига киради. У ҳар қандай вақтда тақиқланган ва номаълум моддалар қаторига киради. Метастерон мушакларнинг ўсиши ва кучини оширадиган синтетик анаболик стероиддир.
Спортчи антидопинг қоидаларини бузганлик учун тайинланган оқибатларга рози бўлди ва ўз қоидабузарлигига эътироз билдирмади.
"Айбини барвақт тан олгани туфайли спортчи дисквалификация муддатини бир йилга қисқартириш ҳуқуқини қўлга киритди. Шу тариқа, унга тўрт йил ўрнига 3 йиллик тақиқ муддати белгиланди - 2025 йил 22 июлдан 2028 йил 21 июлгача," - дейилади хабарда.
Бунда спортчининг 2025 йил 11 июндан (намуна олинган сана) 2025 йил 22 июлга (вақтинча четлаштирилган сана) қадар бўлган даврдаги натижалари бекор қилинади.
Изоҳ