Наманганда аёл оиласи уйсиз қолишида туман ҳокимини айблади

Аввалроқ ижтимоий тармоқларда мактубнинг суратлари тарқалган эди. Унда ёзилишича, муаллиф ва унинг оиласи ҳоким қарори туфайли уйсиз қолгани ёзилган.

"Сизнинг қарорингиз туфайли биз уйсиз қолдик. Онам сарсон-саргардонликда вафот этди. Акам ҳалигача уй-жойсиз, уйланолмай юрибди. Қачондир сиз ўз уйингизга қайтишингизга ишонамиз, биз эса 13 йилдан бери ўз уйимизга қайта олмаяпмиз," - дейилади мактубда.

Мактуб президент танқидига учраган Норин тумани ҳокими Шўрариқ маҳалласидаги эски контейнерга кўчиб ўтганидан кейин пайдо бўлган.

Туман ҳокимлиги бу хабарга муносабат билдириб, ишчи гуруҳ тузилганини маълум қилди.

Қайд этилишича, хат муаллифи Салима Қўлдошева муқаддам ўз муаммолари билан ҳокимга ёки ҳокимликка мурожаат қилмаган.

"Унинг мурожаати батафсил кўриб чиқилди. Айни пайтда туман ҳокими томонидан С. Қўлдошевага амалий ёрдам кўрсатиш чоралари кўрилмоқда. Хусусан, "Аёллар дафтари"га киритилган. Бундан ташқари, укаси А. Қўлдашев айни вақтда хорижда эканлиги учун маҳалла ёшлар етакчиси иштирокида видео алоқа орқали гаплашганлиги, 10 кун ичида миграциядан қайтариш ҳамда ўзига мос ишга жойлаш чоралари кўрилаётганлигини маълум қиламиз," - дейилади ҳокимлик хабарида.