"Вагнер" ХҲК таркибида жанговар ҳаракатларда иштирок этган ва ёлланиш бўйича айбланган қашқадарёлик судланди, деб хабар бермоқда UzNews.uz мухбири суд ҳукмига таяниб.
Иш материалларига кўра, 59 ёшли Р.Д. 2020 йил февраль ойида ишлаш учун Москвага жўнаб кетган. У ерда ётоқхонадаги қўшнисини ўлдирганликда гумонланиб, қўлга олинган. 2021 йил августида у 9 йилга озодликдан маҳрум этилган.
2022 йил сентябрь ойида судланувчи "Вагнер" хусусий ҳарбий компанияси томонидан ёлланган. Унга ойига 100 минг рубл маош, РФ фуқаролигини олиш, шунингдек, муддатнинг қолган қисмини ўташни бекор қилиш ваъда қилинган.
Ушбу ташкилот таркибида у 6 ой давомида Россия Федерацияси томонида жанговар ҳаракатларда қатнашган. Жанговар ҳаракатларда намунали иштироки учун у афв этилган.
Ҳарбий хизматни тугатгандан сўнг, 2025 йил мартигача Р.Д. Москвада ишлаган, шундан сўнг Ўзбекистонга қайтиб келган. ДХХнинг Қашқадарё вилояти бўйича бошқармасига бориб, ўз айбига иқрор бўлган ҳамда ҳарбий ҳаракатларда иштирок этганлигини тасдиқловчи ҳужжатларни тақдим этган.
Судда у қилмишидан чин кўнгилдан пушаймонлигини, қилмишининг оқибатларини англаб етганини айтиб, бундан буён бундай жиноятга қўл урмасликка ваъда берган ва афв этилишини сўраган.
Суд ҳукмига кўра, фуқаро Р.Д. ЖКнинг 154-моддаси 1-қисмида назарда тутилган жиноятни содир этганликда айбдор деб топилди. Унга нисбатан 3 йил 6 ой озодликни чеклаш жазоси тайинланди.
Изоҳ