Осиёнинг энг кучли жамоаларидан бирига қарши баҳс олиб борамиз — Қатар футболчиси Абдулазиз Ҳатим

Бугун, 9 июнь куни Ўзбекистон ва Қатар учрашуви олдидан жамоалар иштирокида матбуот анжумани ўтказилди. Дастлаб Қатар терма жамоаси бош мураббийи Хулен Лопетеги ва футболчи Абдулазиз Ҳатим анжуманда иштирок этди.

Хулен Лопетеги:

— Аввало, Ўзбекистон миллий терма жамоасини Жаҳон чемпионати йўлланмасини қўлга киритгани билан самимий табриклайман. Бу жуда катта ютуқ ва жамоа бунга тўлиқ муносиб эди. Биз гуруҳдаги энг кучли жамоалардан бирига қарши ўйнаймиз. Мундиалга йўл очилишига кичик имкониятимиз сақланиб қолган, шунинг учун эртанги ўйинда бошқа футболчиларимизни синаб кўриш имконияти ҳам бўлади.

Ўзбекистонлик футболчилар Европанинг етакчи лигаларида фаолият юритмоқда. Эртанги ўйинни жуда жиддий қабул қилишимиз керак, чунки бу баҳс октябрь ойида бошланадиган плей-офф босқичига дастлабки тайёргарлик учун хизмат қилади. Имкониятимиздан максимал даражада фойдаланиб, ғалаба учун курашамиз. Ўтган учрашувлар ҳақида гапирмоқчи эмасман, бор эътиборимиз эртанги ўйинга қаратилган.

Абдулазиз Ҳатим:

— Осиёнинг энг кучли жамоаларидан бирига қарши баҳс олиб борамиз. Икки жамоа ўртасидаги учрашувлар доимо муросасиз кечган. Плей-офф босқичига йўл олдик, шунинг учун эртанги ўйинни келаси босқич учун дастлабки тайёргарлик ўйини бўлади. Бу биз учун жуда муҳим ўйин, чунки рақибимиз Жаҳон чемпионати йўлланмасини қўлга киритган. Уларнинг футболчилари жисмонан ҳам, руҳий жиҳатдан ҳам кучли, бироқ биз ғалаба қозониш учун бор имкониятимизни ишга соламиз.

Шундан сўнг, Ўзбекистон бош мураббийи ва жамоа сардори Элдор Шомуродов ҳам ўз фиркларини билдириб ўтди.

Тимур Кападзе:

— Барчани мундиал йўлланмаси билан табриклайман. Эртанги учрашувга тўлиқ тайёрмиз ва ғалаба қозониб, халқимизни хурсанд қилишга ҳаракат қиламиз.

"Аввало, барчани тарихий натижа – Жаҳон чемпионатига йўлланмаси билан табриклайман. Қизиқарли учрашув бизни кутмоқда. Чиройли ўйин кўрсатиб, ғалаба қозониш ва мухлисларимизни хурсанд қилиш ниятидамиз. Мундиалга чиққанимиз ва қандай натижа қайд этганимизни яхши тушуниб турибмиз. Лекин ҳозир бор эътиборимиз Қатарга қарши баҳсга қаратилган. Насиб қилса, эртанги ғалаба ва мундиал йўлланмасини мухлисларимиз билан биргаликда нишонламоқчимиз", - дейди Элдор Шомуродов.