Тошкент халқаро аэропортида Деҳлидан учиб келган йўловчининг пальтоси чўнтагидан 281 карат хажмдаги олмос қимматбаҳо тошлари топилди. Бу ҳақда Божхона Матбуот хизмати хабар берди.
Тошкент халқаро аэропорти чегара-божхона пости ходимлари томонидан фош қилинган мазкур ҳолатда йўловчи божхона назоратига тақдим этмаган олмосларнинг умумий қиймати дастлабки ҳисоб-китобларга кўра 873 млн сўмдан ошиқроқ экани маълум бўлди.
Ҳиндистондан учиб келган яна бир йўловчининг багажини кўздан кечириш давомида ушбу хориж фуқароси ҳам 57 дона турли ўлчамдаги олмос тошларини яширинча олиб киришга урингани аниқланди.
Божхона назоратига тақдим қилинмаган қимматбаҳо тошларнинг қиймати дастлабки ҳисоб-китобларга кўра 942 млн сўмдан ошиқроқ эканлиги аниқланди.
