Аввалроқ, Фарғона вилояти ҳокимининг собиқ ўринбосари Нуриддин Мамажонов Беларусдаги дипломатик ваколатхонага раҳбарлик қилгани ҳақида ёзган эдик.
Ўзбекистоннинг Беларусдаги янги элчиси Александр Лукашенкога ишонч ёрлиқларини топширди.
Маросимда Ўзбекистон элчиси билан бирга Бразилия, Перу, Мўғулистон, Жанубий Корея, Мянма, Саудия Арабистони, Ливия ва Руанданинг янги тайинланган элчилари иштирок этди.
Александр Лукашенко дипломатик миссияларнинг янги раҳбарларига мурожаат қилар экан, Ўзбекистоннинг Марказий Осиёдаги ролини алоҳида қайд этди. У Ўзбекистон президентининг ўтган ойда Беларусга амалга оширган тарихий ташрифи икки томонлама муносабатларни стратегик шериклик даражасига кўтаргани ва икки давлат ўртасидаги ҳамкорликни ривожлантиришнинг янги босқичини очиб берганини таъкидлади.
Дипломатлар билан қисқа мулоқот чоғида Беларус президенти Ўзбекистон-Беларус ҳамкорлиги мавзусига бир неча бор қайтди. У икки мамлакат ўртасидаги савдо-инвестиция лойиҳалари фаоллашганини таъкидлаб, икки томонлама муносабатлар янги суръат ва прагматик хусусият касб этганини, бу унинг Ўзбекистон президенти билан очиқ, ишончли ва дўстона муносабатлари туфайли амалга ошганини таъкидлади.
Маросим давомида элчиларга ҳамроҳлик қилган Беларус ташқи ишлар вазири Максим Риженков президент Александр Лукашенкога Ўзбекистон билан эришилган келишувларни амалга оширишни жадаллаштириш чоралари кўрилаётганини маълум қилди.
Изоҳ