Халқ депутатлари Тошкент шаҳар кенгаши маҳаллий бюджетнинг қўшимча манбалари ҳисобидан 21,48 млрд сўм ажратиш тўғрисида қарор қабул қилди.
Шундан 11,95 млрд сўми марказий ва энг муҳим кўчалар учун мавсумий гуллар ва манзарали буталар харид қилишга йўналтирилади. Яна 2,15 млрд сўм марказий майдонларни кўкаламзорлаштириш бошқармасига, 900 млн сўм эса давлат объектлари ҳудудларини ободонлаштириш билан шуғулланувчи бошқармага берилади.
Бундан ташқари, муҳим кўчаларни ободонлаштириш ва кўкаламзорлаштириш бошқармаси фаолиятига қўшимча 3,8 млрд сўм ажратилади. Ушбу маблағлар иккинчи чорак якунлари бўйича бюджет даромадлари режасининг ошириб бажарилиши ҳисобидан молиялаштирилади.
Умумий маблағнинг бир қисми ижтимоий соҳага йўналтирилади. Унга кўра, Тошкент туризм ва меҳмонхона менежменти техникуми учун асбоб-ускуналар харид қилишга 248 млн сўм, Олий Мажлис ҳузуридаги жамоат фонди шаҳар бўлимининг моддий-техник базасини мустаҳкамлашга 40,4 млн сўм ажратилади.
Яна 2,39 млрд сўм "Билим" ахборот-кутубхона маркази биноси ва ички хоналарини капитал таъмирлашга йўналтирилади.
Изоҳ