Қашқадарё вилояти Яккабоғ туман суди хорижий давлат ҳудудида ҳарбий ҳаракатларда иштирок этганликда айбланган фуқаро Б.Аминовга нисбатан ҳукм чиқарди.
Суд ҳужжатларига кўра, 1988 йилда туғилган Б.А. аввал Россияда гиёҳвандлик билан боғлиқ жиноят учун судланган ва жазони ўтаётган вақтда Россия Федерацияси Мудофаа вазирлиги билан шартнома тузган. Унга жазодан муддатидан илгари озод бўлиш, фуқаролик олиш ҳамда пул мукофотлари ваъда қилинган.
2025 йилда у Украина ҳудудида Россия томонидаги ҳарбий ҳаракатларда иштирок этган. Жанг вақтида жароҳат олгач, ҳарбий госпиталда даволанган ва кейинчалик у ердан чиқиб кетиб, Ўзбекистон элчихонаси орқали Ватанга қайтган.
Судда у ўз ҳаракатларидан пушаймонлигини билдирган ва урушда мажбурий иштирок этганини таъкидлаган. Бироқ суд унинг айбини тўлиқ тасдиқланган деб топди.
Суд қарорига кўра, Б.Аминов Ўзбекистон Республикаси Жиноят кодексининг 154-моддаси 1-қисми билан айбли деб топилиб, 3 йил муддатга озодликдан маҳрум этилди. Жазо умумий тартибли колонияда ўталади.
Изоҳ