Давлат раҳбари сешанба куни бўлиб ўтган йиғилишда таъкидлашича, ўтган йили қурилиш билан боғлиқ 2,6 миллиондан ортиқ аризанинг учдан бир қисми рад этилган.
«Масъуллар “камчиликлар борлиги учун қайтарилди” дейди. Лекин чуқур таҳлил қилинса, муаммолар анча кўп. Буни ҳамма билади, лекин ўзини билмасликка олади. Аслида бу — коррупция! Буни бартараф этишнинг ягона йўли — рақамлаштириш ва сунъий интеллект», — деди президент.
Шунингдек, фуқаролар ва тадбиркорлар қурилишни бошлаш учун аввал лойиҳалашга рухсат олиш, кейин эса архитектура-режалаштириш топшириғини ишлаб чиқиш учун яна алоҳида ариза беришга мажбур бўлаётгани, бу эса ойлаб вақт олаётгани қайд этилди.
Тошкент шаҳрида ушбу икки хизматни бир вақтнинг ўзида кўриб чиқиш амалиёти жорий этилган бўлиб, натижада ҳужжатларни келишиш муддатлари 3–4 баробарга қисқарган. Бу тажрибани 1 июлдан бошлаб барча ҳудудларда жорий этиш топширилди.
Ҳозирда электр энергияси, газ, сув ва канализация тармоқларига уланиш учун ҳар бир коммунал хизматга алоҳида мурожаат қилиш талаб этилади. 1 июлдан бошлаб барча техник шартларни бир ариза ва бир тўлов орқали олиш имкониятини яратиш вазифаси қўйилди.
Йиғилишда, шунингдек, хусусийлаштириш дастурларини шакллантиришда ҳокимларнинг роли етарлича инобатга олинмаётгани ва тадбиркорлар фикри ўрганилмаётгани таъкидланди. Объектларни сотишда эса биринчи навбатда ҳудудга инвестиция киритиш ва иш ўринлари яратиш масалалари ҳисобга олиниши лозим.
Президентнинг билдиришича, эндиликда ҳокимлар Давлат активларини бошқариш агентлиги билан бир қаторда объектларни хусусийлаштириш дастурларига киритиш, уларни амалга ошириш ва инвестициялар самарадорлиги учун тенг жавобгар бўлади.
Шу билан бирга, хусусийлаштириш доирасида бўлиб-бўлиб тўлаш асосида сотилган объектлар бўйича қолдиқ суммага ҳар йили қўшиб бориладиган 14 фоизлик устама бекор қилиниши ҳақида қарор қабул қилинди.
Изоҳ