Риштон туман жиноят ишлари бўйича судида ёлланмачиликда айбланган фуқаро иши кўриб чиқилди, дея хабар бермоқда UzNews.uz мухбири суд ҳукмига таяниб.
Иш материалларига кўра, судланувчи 2023 йил март ойида Воронеж шаҳрига бориб, озиқ-овқат етказиб бериш хизматига ишга жойлашган. Иш фаолияти давомида у психотроп моддаларнинг ноқонуний муомаласи бўйича қўлга олинган ва 6 йил 6 ой муддатга озодликдан маҳрум этилган.
Жазони ўташ даврида колонияга ўзини мудофаа идораси ходимлари деб таништирган шахслар келиб, Россия ва Украина ўртасидаги урушда иштирок этиш истагида бўлганлар рўйхати шакллантирилаётганини маълум қилган. Контракт тузганларга ойига 1 200 000 рубль миқдорида маош, Россия фуқаролиги ҳамда қолган жазодан озод этиш ваъда қилинган.
Судланувчининг айтишича, унга саккиз марта урушда иштирок этиш таклиф қилинган, аммо ҳар сафар рад этган. Кейинчалик ҳамхонасининг кўндиришидан сўнг, 2025 йил 23 июль куни Россия Федерацияси Мудофаа вазирлиги билан контракт имзолаган.
Шундан сўнг у Луганск вилоятидаги полигонда ҳарбий тайёргарликдан ўтган ва ҳарбий қисмга юборилган. У 2025 йил 23 июлдан 30 сентябрга қадар Украинага қарши жанг ҳаракатларида иштирок этган. Жанглар давомида жароҳат олган ва 2025 йил 29 октябрь куни ватанга қайтиш ҳақидаги ҳужжат билан Ўзбекистонга қайтган.
Қайтиб келгач, у Риштон тумани ИИБга ихтиёрий равишда келиб, жангларда иштирок этиш вақтида жароҳат олганини тасдиқловчи ҳужжатлар нусхаларини тақдим этган.
Суд уни Ўзбекистон Республикаси Жиноят кодексининг 154-моддаси 1-қисмида назарда тутилган жиноятни содир этганликда айбдор деб топди. Унга 3 йил муддатга озодликни чеклаш жазоси тайинланди.
Изоҳ