Ҳокимлик сенатор сўровига жавобда тушунтиришича, собиқ тергов ҳибсхонасининг бир қисми компенсация эвазига корхонага фойдаланишга берилган. Компания бу жойда меҳмонхона қурмоқчи.
Бир ой олдин Сенат Тошкент ҳокими Шавкат Умурзоқовга "Тоштурма" ўрнида ободонлаштириш ишларини кечиктириш бўйича сўров юборган эди.
Эслатиб ўтамиз, 1-сонли тергов ҳибсхонаси 2017 йилда Зангиота туманига кўчирилган эди. Собиқ тергов ҳибсхонасининг бино ва иншоотлари ҳамда унга туташ ҳудуд (2,9 гектар) пойтахт ҳокимлиги балансига ўтказилди. Ушбу ҳудудда барча инфратузилмага эга замонавий хиёбон барпо этиш вазифаси белгиланди.
Бироқ, сўровда айтилишича, ушбу ҳудуддаги ер майдонлари қаровсиз қолмоқда, айрим қурилиш ташкилотлари эса ҳудуддан ўз манфаатлари йўлида фойдаланишга уринмоқда, бу эса фуқароларнинг ҳақли эътирозларига сабаб бўлмоқда.
Пойтахт ҳокимлиги сенатор сўровига жавоб берди.
Унда айтилишича, Тошкент шаҳар ҳокимининг 2020 йил 7 октябрдаги 888-сонли қарорига асосан Ogneupor корхонасига Чинобод кўчасидаги ўзига тегишли объект (3,0 гектар ва 2 571 м2 қурилишлар) бузиб ташлангани учун компенсация сифатида 2,9 гектар ер майдони (собиқ тергов ҳибсхонаси ҳудуди) берилган. Ер участкасидан доимий фойдаланиш ҳуқуқи 2021 йил 5 октябрда давлат рўйхатидан ўтказилган.
Юнусобод тумани Қурилиш бошқармаси Архитектура-шаҳарсозлик кенгаши хулосаси асосида 76 кв. м. майдонга эга маъмурий бино лойиҳаси тасдиқланди. Қурилиш 2024 йил 6 апрелда фойдаланишга топширилган бўлиб, объект нотурар жой сифатида рўйхатдан ўтказилган. Кейинчалик ушбу участка консервация зонасига киритилди, яъни қўшимча турар-жой ва нотурар жой объектларини қуриш тақиқланди.
"Ҳокимнинг 888-сонли қарорида ушбу ҳудудда амалга оширилиши керак бўлган қурилиш тури ҳақида кўрсатма бўлмаган. Шу сабабли, қурилган маъмурий бинонинг хусусияти ва ҳажмидан қатъи назар, мулк ҳуқуқи 2024 йил 9 апрелда рўйхатдан ўтказилган бўлиб, фойдаланишга топшириш учун рухсатнома мулк ҳуқуқини давлат рўйхатидан ўтказиш учун асос бўлиши кўрсатилган. 08.05.2019 йил ҳолатига кўра, жамиятга умумий майдони 7,4 гектар бўлган ер участкаси тегишли бўлган, ҳозирда - 4,4 гектар," - дейилади жавобда.
Қайд этилишича, дастлаб корхона ёнғинга чидамли материаллар ишлаб чиқариш учун саноат объектини қуришни режалаштирган, бироқ лойиҳачи билан маслаҳатлашгандан сўнг, ҳудуд тўлиқ турар-жой бинолари билан ўралгани ва саноат қурилиши мумкин эмаслиги маълум бўлган.
Шу муносабат билан замонавий меҳмонхона қуришга қарор қилинди, бироқ ҳозирда лойиҳани амалга ошириш учун маблағ етишмаяпти.
2022 йилда, сўнгра 2025 йил февраль-август ойларида корхона участкани хусусийлаштириш учун ариза топширган. Бироқ, Тошкент шаҳрининг Бош режасига кўра, участка консервация зонасига киритилгани сабабли улар рад этилган.
Корхона раҳбарияти участка консервация зонасидан чиқарилган тақдирда инвесторни жалб қилиб, меҳмонхона ва маиший хизмат кўрсатиш объектлари бўлган кўп қаватли турар-жой биносини қуриш лойиҳасини амалга ошириш ниятида эканлигини маълум қилди.
Изоҳ