Ўтган йилнинг декабрь ойи бошида ижтимоий тармоқ фойдаланувчилари Humans иловасига бириктирилган банк карталаридан пул маблағлари эгаларига билдирмасдан ечиб олингани ҳақида хабар берган эди. Баъзилар картасидан 20-30 млн сўмгача пул ечиб олинганини маълум қилганди.
Ўшанда компания 4 декабрдан 8 декабргача бўлган пул ечиб олиниши "OCTAGRAM" АЖ бўлган Paylov ҳамкорининг заифлиги туфайли содир бўлганини таъкидлаган эди.
Humans Paylov инфратузилмасидаги заифликларни текшириш ва ҳуқуқбузарларни аниқлаш учун Марказий банк ва ҳуқуқни муҳофаза қилиш органларига техник материалларнинг тўлиқ тўпламини топширди.
Марказий банк хавфсизлик талабларига риоя этилишини таъминлаш ва юзага келиши мумкин бўлган заифликни бартараф этиш мақсадида "Octagram" АЖга P2P операцияларини тўхтатиб туриш бўйича кўрсатма берди ва текширувни бошлади.
7 январь куни регулятор махсус тузилган ишчи гуруҳ текширувни якунлаганини маълум қилди.
"Текширув якуни бўйича тузилган далолатнома белгиланган тартибда ҳуқуқий баҳо бериш ва ваколат доирасида чора кўриш учун Тошкент шаҳар Ички ишлар бош бошқармасига юборилди," - дейилади хабарда.
Ҳозирда Тошкент шаҳар Ички ишлар бош бошқармаси томонидан Humans компанияси билан боғлиқ ҳолат ўрганилмоқда.
Мазкур ҳолат юзасидан фуқаролардан ҳуқуқни муҳофаза қилувчи органларга мурожаат қилиш сўралмоқда.
Комментарии